قر مەملەكەتتٸك رەمٸزدەرٸ كٷنٸ ورال قالاسىندا 150 پەتەرلٸك تۇرعىن ٷي پايدالانۋعا بەرٸلدٸ. ونىڭ 104 پەتەرٸ «وتباسى بانك» اق ارقىلى تۇرعىن-ٷي كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى اياسىندا باسپاناعا مۇقتاج رەتٸندە كەزەكتە تۇرعان ەلەۋمەتتٸك وسال توپتاعىلار, كٶپبالالى جانۇيالار, مەملەكەتتٸك قىزمەتشٸلەر, ەسكەريلەر جەنە ٶزگە دە ساناتتاعى وتباسىلارعا تابىستالدى, دەپ حابارلايدى dalanews.kz.
جاڭا قونىس يەلەرٸن وبلىس ەكٸمٸ ناريمان تٶرەعاليەۆ قۇتتىقتادى.
- مەملەكەت باسشىسى قاسىم-جومارت كەمەلۇلى توقاەۆتىڭ تٸكەلەي تاپسىرماسىمەن ٶڭٸرٸمٸزدە تۇرعىن ٷي قۇرىلىسى قارقىن الدى. سونىڭ ٸشٸندە «اقجايىق» شاعىناۋدانىنىڭ ەلەۋەتٸ زور. مۇندا ينجەنەرلٸك جەلٸلەردٸ تارتتىق, جول سالدىق. ورال قالاسىنىڭ ورتالىعىنا قاتىناستى جەڭٸلدەتۋ ٷشٸن كٶپٸر سالۋدى قولعا الدىق. كەلەشەكتە 1500 ورىندىق مەكتەپ, بالاباقشا, اۋرۋحانا, سپورت كەشەنٸن سالامىز. بۇل — قۇر ۋەدە ەمەس, جٷيەلٸ جوسپارعا ساي اتقارىلىپ جاتقان ناقتى ٸستەر. باستى ماقسات — حالىقتىڭ ٶمٸر سٷرۋ ساپاسىن ارتتىرۋ, - دەدٸ ايماق باسشىسى.
وبلىس ەكٸمٸ جاڭا قونىس يەلەرٸن مەملەكەتتٸك رەمٸزدەر كٷنٸمەن دە قۇتتىقتاپ, وسىنداي يگٸلٸكتٸ شارالار جاس ۇرپاقتىڭ بويىندا وتانسٷيگٸشتٸك سەزٸمدٸ ارتتىرىپ, ساپالى بٸلٸم الىپ, ادال ەڭبەك ەتۋگە قاناتتاندىراتىنىنا سەنٸم بٸلدٸردٸ.
ايتا كەتەيٸك, ورال قالاسىندا 27 مىڭ ادام تۇرعىن ٷي كەزەگٸندە تۇر. ولاردى باسپانامەن قامتۋ باعىتىندا بيىل 1800 پەتەرلٸك 20 كٶپقاباتتى تۇرعىن ٷي سالۋ جوسپارلاندى.
