− Elbasynyń «Bolashaqqa baǵdar: rýhani jańǵyrý» baǵdarlamalyq maqalasyndaǵy mindetterdi oryndaýda Sizderdiń ujymdaryńyzǵa da artylar júk erekshe. Óitkeni, búginde álem kóbinese, ekonomikany ǵana damytýǵa bet alǵan tusta bolashaq urpaqqa tálim-tárbie berer, rýhani azyq qaldyrar mádeniet mekemeleriniń jaýapkershiligi orasan dep bilemin. Sondyqtan, bir-birimen tyǵyz bailanysta jumys isteitin vokal trýppasy, hor ártisteri, balet trýppasy jáne orkestr ártisteriniń jumystardy jańa álemdik baǵytta damytýyn qalar edim. Máselen, teatr ujymyna ónerdiń miýzikl janryn álemdik jáne ulttyq naqyshta damytýdy usynar edim. Sebebi, qazir búkil álem bul janrǵa qyzyǵady, kóptep barady, − degen ákim opera men balet ónerine halyqty kóptep tartýdyń joldaryn qarastyrý qajettigin aitty.
Rýhani salany damytýda teatr ártisteriniń áleýmettik jaǵdaiyn retteýge barynsha qoldaý bildirýge tyrysatynyn aitty.
Óz kezeginde, mádeniet mekemesiniń betke ustar ártisi QR Mádeniet qairatkeri Úralhan Seilbekova arnaiy kelgen óńir basshysyna alǵysyn bildirdi. Vokal ártisi aimaq basshysynyń mádeniet qyzmetkerlerimen bolǵan júzdesýinde Ońtústik óneri men mádenietin halyqaralyq deńgeige kóterý nietindemin dep aitqan sózi barsha sala mamandaryna eki ese jaýapkershilik júktegenin aitty. Sondai-aq, ol óńirdegi mádeniet qyzmetkerlerin Túrkiiaǵa arnaiy jibergeni úshin alǵysyn bildirip, bul shyǵarmashylyq jandardy odan ári shabyttandyratynyn jetkizdi.
Al teatrdyń bas dirijeri Qýanysh Ismailov biylǵy Túrkistanda ótip jatqan Túrksoi uiymynyń túrli is-sharalary joǵary deńgeide uiymdastyrylyp jatqanyn airyqsha atap aityp, túrli gastroldik saparlarǵa qoldaý bildirýdi surady.
Aita ketý kerek, opera óneri arqyly tarihi-mádeni qundylyqtardy halyqqa jetkizý, qoiylym jáne mádeni qoǵamdyq jumystar uiymdastyrý, ulttyq dástúrdi jańǵyrtý maqsatynda kórermenderge spektaklder qoiý maqsatynda oblystyq opera jáne balet teatry 2007 jyly qurylǵan bolatyn. Búginde 200-den astam teatr áritisteri men qyzmetkerleri bar óner ordasynyń repertýarynda 16 spektakl bar.
OQO ákiminiń baspasóz qyzmeti
