Búgin Ońtústik Qazaqstanda oblys əkimi janyndaǵy «Yrys aldy – yntymaq» qoǵamdyq forýmy ótti. Shymkent qalasy «Musa» saltanat saraiynda ótken oblystyq shara - «Ardagerler – urpaq sabaqtastyǵynyń ózegi» taqyrybyna arnaldy. Is-sharany jazýshy, qoǵamdyq forýmnyń hatshysy Marhabat Baiǵut júrgizdi.
Qoǵamdyq forýmǵa óńirimizdegi barlyq aýdan, qaladan delegattar, ziialy qaýym ókilderi, depýtattar men quqyq qorǵaý organdarynyń qyzmetkerleri, dini basqarma imamdary men BAQ ókilderi jalpy sany 300-den astam azamat qatysty.
Jiynda sóz alǵan Ońtústik Qazaqstan oblysynyń ákimi Janseiit Túimebaev tárbielik maǵynasy zor forýmǵa jinalǵan kópshilikti Ramazan aiymen quttyqtap, búgingi taqyryp aiasynda oiyn ortaǵa saldy.
«Bizdiń qazaqta qadirmendi qariialardyń, abyz aqsaqaldardyń orny erek. Bul uly qasietter, saiyp kelgende, ulttyq kodymyzdyń ýyzyna jatady. Elbasymyz óziniń «Bolashaqqa baǵdar: rýhani jańǵyrý» maqalasynda jańa turpatty jańǵyrýdyń eń basty sharty – sol ulttyq kodyńdy saqtai bilý ekenine, onsyz jańǵyrý degenimiz qur jańǵyryqqa ainalýy múmkin degen bolatyn. Baiyrǵy tarihymyzǵa ai kózimen qarasaq, qai kezde de qazynaly qariialar eldi birlik pen adal eńbekke jetelep otyrǵan. Ultymyzdyń ulaǵatty salt-dástúrlerin ómir mektebi retinde damytyp, urpaqtar sabaqtastyǵyna ulastyryp, keleshekti kemeldendirýden aianbaǵan»,-dedi ákim.
Sonymen qatar, óz baiandamasynda J.Túimebaev «Bolashaqqa baǵdar: rýhani jańǵyrý» atty baǵdarlamalyq maqalasynda aiqyn kórsetilgen baǵdarlar men jobalardy júzege asyrýda qariiamyz ben jasymyz bilek sybana, birlik pen yntymaqty tý etip kirisýimiz kerek dedi.
Forým barysynda Ardagerler uiymynyń qurylǵanyna 30 jyl tolýyna orai óńirdegi 20 ardager «Oblysqa sińirgen eńbegi úshin» medalimen nagradtalsa, eki ardager oblys ákiminiń Gramotasymen marapattaldy.
Óz kezeginde, oblystyq ardagerler keńesiniń tóraǵasy Jeńisbek Məýlenqulov «30 jyl – 30 beles» taqyrybynda baiandama jasasa, qoǵam qairatkeri, eńbek ardageri Shalatai Myrzahmetov urpaqtar sabaqtastyǵy jáne ádemi qartaiýdyń mán-maǵynasyna toqtaldy. Al, meditsina salasynyń ardageri, ǵylymdarynyń doktory Imanáli Baidaýletov «Eńbegine sengenniń eńsesi biik» taqyrybynda baiandama jasady. Sondai-aq, aitysker aqyn Birjan Baitýov «Qariialar men jastar. Rýhani jańǵyrý jáne týǵan jer» taqyrybynda jastardyń atynan óz oi-pirimen bólisti.
Jiyn barysynda forýmǵa qatysýshylar orta toltyrǵan pikirler negizinde arnaiy qarar qabyldady.
