بۇگىن وڭتۇستىك قازاقستاندا وبلىس اكىمى جانىنداعى «ىرىس الدى – ىنتىماق» قوعامدىق فورۋمى ءوتتى. شىمكەنت قالاسى «مۇسا» سالتانات سارايىندا وتكەن وبلىستىق شارا - «ارداگەرلەر – ۇرپاق ساباقتاستىعىنىڭ وزەگى» تاقىرىبىنا ارنالدى. ءىس-شارانى جازۋشى، قوعامدىق فورۋمنىڭ حاتشىسى مارحابات بايعۇت جۇرگىزدى.
قوعامدىق فورۋمعا وڭىرىمىزدەگى بارلىق اۋدان، قالادان دەلەگاتتار، زيالى قاۋىم وكىلدەرى، دەپۋتاتتار مەن قۇقىق قورعاۋ ورگاندارىنىڭ قىزمەتكەرلەرى، ءدىني باسقارما يمامدارى مەن ب ا ق وكىلدەرى جالپى سانى 300-دەن استام ازامات قاتىستى.
جيىندا ءسوز العان وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ تاربيەلىك ماعىناسى زور فورۋمعا جينالعان كوپشىلىكتى رامازان ايىمەن قۇتتىقتاپ، بۇگىنگى تاقىرىپ اياسىندا ويىن ورتاعا سالدى.
«ءبىزدىڭ قازاقتا قادىرمەندى قاريالاردىڭ، ابىز اقساقالداردىڭ ورنى ەرەك. بۇل ۇلى قاسيەتتەر، سايىپ كەلگەندە، ۇلتتىق كودىمىزدىڭ ۋىزىنا جاتادى. ەلباسىمىز ءوزىنىڭ «بولاشاققا باعدار: رۋحاني جاڭعىرۋ» ماقالاسىندا جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ ەكەنىنە، ونسىز جاڭعىرۋ دەگەنىمىز قۇر جاڭعىرىققا اينالۋى مۇمكىن دەگەن بولاتىن. بايىرعى تاريحىمىزعا اي كوزىمەن قاراساق، قاي كەزدە دە قازىنالى قاريالار ەلدى بىرلىك پەن ادال ەڭبەككە جەتەلەپ وتىرعان. ۇلتىمىزدىڭ ۇلاعاتتى سالت-داستۇرلەرىن ءومىر مەكتەبى رەتىندە دامىتىپ، ۇرپاقتار ساباقتاستىعىنا ۇلاستىرىپ، كەلەشەكتى كەمەلدەندىرۋدەن ايانباعان»،-دەدى اكىم.
سونىمەن قاتار، ءوز بايانداماسىندا ج.تۇيمەبايەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايقىن كورسەتىلگەن باعدارلار مەن جوبالاردى جۇزەگە اسىرۋدا قاريامىز بەن جاسىمىز بىلەك سىبانا، بىرلىك پەن ىنتىماقتى تۋ ەتىپ كىرىسۋىمىز كەرەك دەدى.
فورۋم بارىسىندا ارداگەرلەر ۇيىمىنىڭ قۇرىلعانىنا 30 جىل تولۋىنا وراي وڭىردەگى 20 ارداگەر «وبلىسقا سىڭىرگەن ەڭبەگى ءۇشىن» مەدالىمەن ناگرادتالسا، ەكى ارداگەر وبلىس اكىمىنىڭ گراموتاسىمەن ماراپاتتالدى.
ءوز كەزەگىندە، وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ «30 جىل – 30 بەلەس» تاقىرىبىندا بايانداما جاساسا، قوعام قايراتكەرى، ەڭبەك ارداگەرى شالاتاي مىرزاحمەتوۆ ۇرپاقتار ساباقتاستىعى جانە ادەمى قارتايۋدىڭ ءمان-ماعىناسىنا توقتالدى. ال، مەديسينا سالاسىنىڭ ارداگەرى، عىلىمدارىنىڭ دوكتورى ءيمانالى بايداۋلەتوۆ «ەڭبەگىنە سەنگەننىڭ ەڭسەسى بيىك» تاقىرىبىندا بايانداما جاسادى. سونداي-اق، ايتىسكەر اقىن ءبىرجان بايتۋوۆ «قاريالار مەن جاستار. رۋحاني جاڭعىرۋ جانە تۋعان جەر» تاقىرىبىندا جاستاردىڭ اتىنان ءوز وي-پىرىمەن ءبولىستى.
جيىن بارىسىندا فورۋمعا قاتىسۋشىلار ورتا تولتىرعان پىكىرلەر نەگىزىندە ارنايى قارار قابىلدادى.
