Sondaı-aq, ákim Ońtústik pen Iran provınsıalary arasynda, onyń ishinde Horasan Razavı aımaǵymen ózara tıimdi saýda-ekonomıkalyq, ınvestısıalyq jáne mádenı-gýmanıtarlyq baılanysty arttyrýdyń mol múmkindigi bar ekenin atap ótti.
– Sizben kezdesip otyrǵanyma jáne Ońtústik Qazaqstan oblysy men Horasan provınsıasy arasyndaǵy eki jaqty baılanysty damytý boıynsha pikir almasýǵa qýanyshtymyn, Gýbernator myrza. Iran – Qazaqstan Respýblıkasynyń táýelsizdigin alǵash bolyp moıyndaǵan elderdiń biri. Biz bıyl eki el arasyndaǵy dıplomatıalyq baılanystyń ornaǵanyna 25 jyl tolýyn atap ótemiz. Iran – Qazaqstannyń Taıaý Shyǵys elderi arasyndaǵy ekinshi saýda áriptesi (BAÁ elinen keıin). Qazaqstan men Iran SHYU, IYU jáne basqa da bedeldi halyqaralyq uıymdar arasynda belsendi baılanys jasaýda. Eki eldiń EAEO aıasyndaǵy qarym-qatynasy da tıimdi ári bolashaǵy jarqyn bolmaq, – dedi Janseıit Qanseıituly.
Iran – damyǵan ındýstrıaldy-agrarly el, óndiris, munaı-gaz salasy men aýyl sharýashylyǵy damyǵan. Edáýir ekonomıkalyq áleýeti bar. Aıta keteıik, 2016 jyly OQO-nyń syrtqy taýar aınalymy 1,9 mlrd AQSH dollaryn qurasa, sonyń ishinde 19 mln AQSH dollary Iran Islam Respýblıkasymen jasalǵan. Ońtústikten Iranǵa jańǵaq, arpa, sement, bylǵary buıymdary eksporttalsa, Irannan bizdiń óńirge negizinen qurylys materıaldary, qubyrlar, keramıka buıymdary, santehnıka, turmystyq hımıa, kilem jáne jemis-jıdekter tasymaldanady.
Óz kezeginde gýbernator Alıreza Rashıdıan túrli salada tyǵyz baılanysty damytýǵa daıyn ekenin jetkizdi. Kezdesý barysynda aımaqtar arasyndaǵy jıi ımport jáne eksporttalatyn taýarlardy tańdap, solar boıynsha birikken jańa óndiris ornyn ashý boıynsha birge jumys isteý týraly usynys jasaldy.
Iran delegasıasy eki kúndik is-sapar barysynda oblystyń ınvestısıalyq múmkindigimen tanysyp, «Kórme» ortalyǵyn, óńirdegi kásiporyndardy kórdi. Buǵan qosa bıznes-qaýymdastyq ókilderimen kezdesip, tarıhı oryndardy aralady.
OQO ákiminiń baspasóz qyzmeti
https://dalanews.kz/27489
