سونداي-اق، اكىم وڭتۇستىك پەن يران پروۆينسيالارى اراسىندا، ونىڭ ىشىندە حوراسان رازاۆي ايماعىمەن ءوزارا ءتيىمدى ساۋدا-ەكونوميكالىق، ينۆەستيسيالىق جانە مادەني-گۋمانيتارلىق بايلانىستى ارتتىرۋدىڭ مول مۇمكىندىگى بار ەكەنىن اتاپ ءوتتى.
– سىزبەن كەزدەسىپ وتىرعانىما جانە وڭتۇستىك قازاقستان وبلىسى مەن حوراسان پروۆينسياسى اراسىنداعى ەكى جاقتى بايلانىستى دامىتۋ بويىنشا پىكىر الماسۋعا قۋانىشتىمىن، گۋبەرناتور مىرزا. يران – قازاقستان رەسپۋبليكاسىنىڭ تاۋەلسىزدىگىن العاش بولىپ مويىنداعان ەلدەردىڭ ءبىرى. ءبىز بيىل ەكى ەل اراسىنداعى ديپلوماتيالىق بايلانىستىڭ ورناعانىنا 25 جىل تولۋىن اتاپ وتەمىز. يران – قازاقستاننىڭ تاياۋ شىعىس ەلدەرى اراسىنداعى ەكىنشى ساۋدا ارىپتەسى (ءباا ەلىنەن كەيىن). قازاقستان مەن يران شىۇ، يىۇ جانە باسقا دا بەدەلدى حالىقارالىق ۇيىمدار اراسىندا بەلسەندى بايلانىس جاساۋدا. ەكى ەلدىڭ ەاەو اياسىنداعى قارىم-قاتىناسى دا ءتيىمدى ءارى بولاشاعى جارقىن بولماق، – دەدى جانسەيىت قانسەيىت ۇلى.
يران – دامىعان يندۋستريالدى-اگرارلى ەل، ءوندىرىس، مۇناي-گاز سالاسى مەن اۋىل شارۋاشىلىعى دامىعان. ەداۋىر ەكونوميكالىق الەۋەتى بار. ايتا كەتەيىك، 2016 جىلى وقو-نىڭ سىرتقى تاۋار اينالىمى 1،9 ملرد اقش دوللارىن قۇراسا، سونىڭ ىشىندە 19 ملن اقش دوللارى يران يسلام رەسپۋبليكاسىمەن جاسالعان. وڭتۇستىكتەن يرانعا جاڭعاق، ارپا، سەمەنت، بىلعارى بۇيىمدارى ەكسپورتتالسا، يراننان ءبىزدىڭ وڭىرگە نەگىزىنەن قۇرىلىس ماتەريالدارى، قۇبىرلار، كەراميكا بۇيىمدارى، سانتەحنيكا، تۇرمىستىق حيميا، كىلەم جانە جەمىس-جيدەكتەر تاسىمالدانادى.
ءوز كەزەگىندە گۋبەرناتور اليرەزا راشيديان ءتۇرلى سالادا تىعىز بايلانىستى دامىتۋعا دايىن ەكەنىن جەتكىزدى. كەزدەسۋ بارىسىندا ايماقتار اراسىنداعى ءجيى يمپورت جانە ەكسپورتتالاتىن تاۋارلاردى تاڭداپ، سولار بويىنشا بىرىككەن جاڭا ءوندىرىس ورنىن اشۋ بويىنشا بىرگە جۇمىس ىستەۋ تۋرالى ۇسىنىس جاسالدى.
يران دەلەگاسياسى ەكى كۇندىك ءىس-ساپار بارىسىندا وبلىستىڭ ينۆەستيسيالىق مۇمكىندىگىمەن تانىسىپ، «كورمە» ورتالىعىن، وڭىردەگى كاسىپورىنداردى كوردى. بۇعان قوسا بيزنەس-قاۋىمداستىق وكىلدەرىمەن كەزدەسىپ، تاريحي ورىنداردى ارالادى.
وقو اكىمىنىڭ باسپا ءسوز قىزمەتى
https://dalanews.kz/27489
