Ońtústik Koreianyń qorǵanys ministri Kim Ion Hion áskeri jaǵdaidyń engizilýine bailanysty otstavkaǵa ketti, dep habarlaidy Dalanews.kz.
Ol el ishinde týyndaǵan dúrbeleń úshin halyqtan keshirim surap, otstavkaǵa ketý týraly sheshim qabyldady.
”Ulttyq qorǵanys ministri retinde tolyq jaýapkershilikti óz moinyma aldym. Qoǵamda alańdaýshylyq pen túsinbeýshilik týdyrǵanym úshin ókinemin”, – dedi Kim Ion Hion.
Onyń aitýynsha, prezidentke áskeri jaǵdai engizý týraly usynysty ózi jasaǵan. Al áskeri qyzmetkerler onyń buiryǵyn oryndaǵan.
“Áskeri jaǵdai joiyldy, halyq burynǵy ómirine qaita oralyp jatyr, biraq ishki saiasi jaǵdai men qaýipsizdik máseleleri áli de qiyn”, – dep qosty ol.
Aita ketsek, Ońtústik Koreia prezidenti Iýn Sok Iol 3 jeltoqsanda elde tótenshe áskeri jaǵdai engizgen bolatyn. Bul sońǵy 45 jylda Ońtústik Koreia basshylyǵy tarapynan engizilgen alǵashqy áskeri jaǵdai boldy.
Kóp uzamai Seýldegi Ulttyq assambleia ǵimaratynyń aldynda narazylyq bildirýshiler jinalyp, politsiia parlament ǵimaratyna kirý joldaryn jaýyp tastady. Qala kóshelerinde áskeri tehnika paida boldy.
Birneshe saǵattan keiin 300 depýtattyń 190-y parlamentke kirip, áskeri tótenshe jaǵdaidy toqtatý úshin daýys berdi. Oppozitsiia jetekshisi Li Dje Men prezidenttiń sheshimin “konstitýtsiiaǵa qaishy” dep atap, ony “halyqqa qarsy áreket” dep synǵa aldy.
Al Qazaqstannyń Koreiadaǵy elshiligi eldegi áskeri tótenshe jaǵdaiǵa qatysty málimdeme jasaǵan bolatyn.
Koreia Respýblikasy prezidenti Iýn Sok Eldiń áskeri jaǵdai engizýine bailanysty Koreia Respýblikasynda júrgen Qazaqstan Respýblikasynyń azamattaryn sabyrlyq saqtap, jergilikti biliktiń usynystaryn oryndaýǵa jáne kópshilik is-sharalardan aýlaq bolýǵa shaqyramyz.
Qazaqstan Respýblikasynyń azamattary úshin tótenshe jaǵdai týyndaǵan jaǵdaida, jedel bailanys úshin +8210-6572-9311telefony arqyly elshilikke habarlasýlaryńyzdy suraimyz!, - delingen elshilik taratqan habarlamada.
