وڭتۇستىك كورەيانىڭ قورعانىس ءمينيسترى كيم ءون ءحون اسكەري جاعدايدىڭ ەنگىزىلۋىنە بايلانىستى وتستاۆكاعا كەتتى، دەپ حابارلايدى Dalanews.kz.

ول ەل ىشىندە تۋىنداعان دۇربەلەڭ ءۇشىن حالىقتان كەشىرىم سۇراپ، وتستاۆكاعا كەتۋ تۋرالى شەشىم قابىلدادى.

”ۇلتتىق قورعانىس ءمينيسترى رەتىندە تولىق جاۋاپكەرشىلىكتى ءوز موينىما الدىم. قوعامدا الاڭداۋشىلىق پەن تۇسىنبەۋشىلىك تۋدىرعانىم ءۇشىن وكىنەمىن”، – دەدى كيم ءون ءحون.

ونىڭ ايتۋىنشا، پرەزيدەنتكە اسكەري جاعداي ەنگىزۋ تۋرالى ۇسىنىستى ءوزى جاساعان. ال اسكەري قىزمەتكەرلەر ونىڭ بۇيرىعىن ورىنداعان.

“اسكەري جاعداي جويىلدى، حالىق بۇرىنعى ومىرىنە قايتا ورالىپ جاتىر، ءبىراق ىشكى ساياسي جاعداي مەن قاۋىپسىزدىك ماسەلەلەرى ءالى دە قيىن”، – دەپ قوستى ول.

ايتا كەتسەك، وڭتۇستىك كورەيا پرەزيدەنتى يۋن سوك ءول 3 جەلتوقساندا ەلدە توتەنشە اسكەري جاعداي ەنگىزگەن بولاتىن. بۇل سوڭعى 45 جىلدا وڭتۇستىك كورەيا باسشىلىعى تاراپىنان ەنگىزىلگەن العاشقى اسكەري جاعداي بولدى.

كوپ ۇزاماي سەۋلدەگى ۇلتتىق اسسامبلەيا عيماراتىنىڭ الدىندا نارازىلىق بىلدىرۋشىلەر جينالىپ، پوليسيا پارلامەنت عيماراتىنا كىرۋ جولدارىن جاۋىپ تاستادى. قالا كوشەلەرىندە اسكەري تەحنيكا پايدا بولدى.

بىرنەشە ساعاتتان كەيىن 300 دەپۋتاتتىڭ 190-ى پارلامەنتكە كىرىپ، اسكەري توتەنشە جاعدايدى توقتاتۋ ءۇشىن داۋىس بەردى. وپپوزيسيا جەتەكشىسى لي دجە مەن پرەزيدەنتتىڭ شەشىمىن “كونستيتۋسياعا قايشى” دەپ اتاپ، ونى “حالىققا قارسى ارەكەت” دەپ سىنعا الدى.

ال قازاقستاننىڭ كورەياداعى ەلشىلىگى ەلدەگى اسكەري توتەنشە جاعدايعا قاتىستى مالىمدەمە جاساعان بولاتىن.

كورەيا رەسپۋبليكاسى پرەزيدەنتى يۋن سوك ەلدىڭ اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان رەسپۋبليكاسىنىڭ ازاماتتارىن سابىرلىق ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز. 

قازاقستان رەسپۋبليكاسىنىڭ ازاماتتارى ءۇشىن توتەنشە جاعداي تۋىنداعان جاعدايدا، جەدەل بايلانىس ءۇشىن +8210-6572-9311تەلەفونى ارقىلى ەلشىلىككە حابارلاسۋلارىڭىزدى سۇرايمىز!، - دەلىنگەن ەلشىلىك تاراتقان حابارلامادا.