Ońtústik Koreia prokýratýrasy ótken aptada elde áskeri jaǵdai engizgen prezident Iýn Sok Iolmen astyrtyn sóz bailasty dep aiyptalǵan burynǵy qorǵanys ministrin resmi túrde jazalaý úshin order surady, dep habarlaidy Dalanews.kz.
Jergilikti Yonhap aqparat agenttiginiń málimetinshe, eks-sheneýnik búlik jasady degen kúdikke ilingen.
Sońǵy 40 jylda alǵash ret engizilgen áskeri jaǵdai nebári alty saǵatqa sozylsa da, el ishinde úlken narazylyq týyndap, jappai sherýler uiymdastyryldy. Iýn men onyń jaqtastary qylmystyq tergeýge alynyp, impichmentke ushyramaq. Ádilet ministrligi Iýn men taǵy segiz adamdy negizgi kúdiktiler dep tanyp, elden shyǵýlaryna tyiym saldy.
Seýldiń ortalyq okrýgtik soty burynǵy qorǵanys ministri Kim Ion Hiondy qamaýǵa alý týraly prokýrorlardyń ótinishin qarap jatqanyn habarlady. Kim Iýnǵa áskeri jaǵdai engizýdi usyndy jáne Ulttyq assambleia depýtattarynyń daýys berýine kedergi keltirý úshin ásker jiberdi dep aiyptalyp otyr.
Eks-shenkýnik el ishinde týyndaǵan dúrbeleń úshin halyqtan keshirim surap, otstavkaǵa ketý týraly sheshim qabyldaǵan bolatyn.
”Ulttyq qorǵanys ministri retinde tolyq jaýapkershilikti óz moinyma aldym", - dedi ol.
Al 8 jeltoqsanda Kim Seýldegi tergeý izoliatoryna qamaýǵa alyndy. Sot order bergen jaǵdaida, ol bul iste jazaǵa tartylatyn alǵashqy adam bolmaq. Prokýrorlar Kimdi 20 kún ishinde tergep, istiń mán-jaiyn saralaýy kerek. Eger búlik jasady degen aiyp dáleldense, Kim ólim jazasyna kesilýi múmkin.
Prokýratýra Kimdi búlikke qatysýdyń basty uiymdastyrýshysy jáne Konstitýtsiiany buzý maqsatynda ásker men politsiiany paidalanyp búlik uiymdastyrdy dep aiyptaýda. Sondai-aq ol biligin asyra paidalandy degen kúdikke ilindi. Seýl prokýratýrasy bul aiyptarǵa qatysty túsinikteme berýden bas tartty.
Aita keteiik, 3 jeltoqsanda keshke Ońtústik Koreia prezidenti Iýn Sok El elde áskeri jaǵdai engizdi.
Bul sheshim oppozitsiialyq Demokratiialyq partiia Parlamentte qysqartylǵan biýdjet týraly zań jobasyn qoldap, memlekettik aýditor men bas prokýrorǵa impichment jariialaý týraly ótinish bergennen keiin qabyldandy. Alaida Ońtústik Koreianyń Ulttyq Assambleiasy elde áskeri jaǵdai engizýge qarsy daýys berdi.
Osylaisha áskeri jaǵdaidy joiýdy talap etken azamattar áskeri adamdarmen jáne politsiiamen qaqtyǵysyp qaldy. Seýl kóshelerinde áskeri tehnika paida boldy.
Keiin el prezidenti áskeri jaǵdaidy alyp tastaitynyn málimdedi.
Araǵa uzaq ýaqyt salmai el prezidenti áskeri jaǵdai engizgeni úshin halyqtan keshirim surady. Ol budan bylai mundai qadamdarǵa barmaýǵa ýáde berdi.
"Shyn kóńilden halyqtan keshirim suraimyn", - dedi ol.
El prezidentiniń aitýynsha, mundai sharaǵa májbúrli túrde barǵan.
"Áskeri jaǵdai jariialaýǵa bailanysty jaýapkershilikten jaltarmaimyn", - dedi ol.
Qazaqstannyń Ońtústik Koreiadaǵy elshiligi qazaqstandyqtarǵa úndeý jasady.
"Koreia Respýblikasy prezidenti Iýn Sok El áskeri jaǵdai engizýine bailanysty Koreia Respýblikasynda júrgen Qazaqstan azamattaryn sabyr saqtap, jergilikti biliktiń usynystaryn oryndaýǵa jáne kópshilik is-sharalardan aýlaq bolýǵa shaqyramyz", — dep jazylǵan habarlamada.
