وڭتۇستىك كورەيا پروكۋراتۋراسى وتكەن اپتادا ەلدە اسكەري جاعداي ەنگىزگەن پرەزيدەنت يۋن سوك ولمەن استىرتىن ءسوز بايلاستى دەپ ايىپتالعان بۇرىنعى قورعانىس ءمينيسترىن رەسمي تۇردە جازالاۋ ءۇشىن وردەر سۇرادى، دەپ حابارلايدى Dalanews.kz.

جەرگىلىكتى Yonhap اقپارات اگەنتتىگىنىڭ مالىمەتىنشە، ەكس-شەنەۋنىك بۇلىك جاسادى دەگەن كۇدىككە ىلىنگەن.

سوڭعى 40 جىلدا العاش رەت ەنگىزىلگەن اسكەري جاعداي نەبارى التى ساعاتقا سوزىلسا دا، ەل ىشىندە ۇلكەن نارازىلىق تۋىنداپ، جاپپاي شەرۋلەر ۇيىمداستىرىلدى. يۋن مەن ونىڭ جاقتاستارى قىلمىستىق تەرگەۋگە الىنىپ، يمپيچمەنتكە ۇشىراماق. ادىلەت مينيسترلىگى يۋن مەن تاعى سەگىز ادامدى نەگىزگى كۇدىكتىلەر دەپ تانىپ، ەلدەن شىعۋلارىنا تىيىم سالدى.

سەۋلدىڭ ورتالىق وكرۋگتىك سوتى بۇرىنعى قورعانىس ءمينيسترى كيم ءون ءحوندى قاماۋعا الۋ تۋرالى پروكۋرورلاردىڭ ءوتىنىشىن قاراپ جاتقانىن حابارلادى. كيم يۋنعا اسكەري جاعداي ەنگىزۋدى ۇسىندى جانە ۇلتتىق اسسامبلەيا دەپۋتاتتارىنىڭ داۋىس بەرۋىنە كەدەرگى كەلتىرۋ ءۇشىن اسكەر جىبەردى دەپ ايىپتالىپ وتىر.

ەكس-شەنكۋنىك ەل ىشىندە تۋىنداعان دۇربەلەڭ ءۇشىن حالىقتان كەشىرىم سۇراپ، وتستاۆكاعا كەتۋ تۋرالى شەشىم قابىلداعان بولاتىن. 

”ۇلتتىق قورعانىس ءمينيسترى رەتىندە تولىق جاۋاپكەرشىلىكتى ءوز موينىما الدىم"، - دەدى ول.

ال 8 جەلتوقساندا كيم سەۋلدەگى تەرگەۋ يزولياتورىنا قاماۋعا الىندى. سوت وردەر بەرگەن جاعدايدا، ول بۇل ىستە جازاعا تارتىلاتىن العاشقى ادام بولماق. پروكۋرورلار كيمدى 20 كۇن ىشىندە تەرگەپ، ءىستىڭ ءمان-جايىن سارالاۋى كەرەك. ەگەر بۇلىك جاسادى دەگەن ايىپ دالەلدەنسە، كيم ءولىم جازاسىنا كەسىلۋى مۇمكىن.

پروكۋراتۋرا كيمدى بۇلىككە قاتىسۋدىڭ باستى ۇيىمداستىرۋشىسى جانە كونستيتۋسيانى بۇزۋ ماقساتىندا اسكەر مەن پوليسيانى پايدالانىپ بۇلىك ۇيىمداستىردى دەپ ايىپتاۋدا. سونداي-اق ول بيلىگىن اسىرا پايدالاندى دەگەن كۇدىككە ءىلىندى. سەۋل پروكۋراتۋراسى بۇل ايىپتارعا قاتىستى تۇسىنىكتەمە بەرۋدەن باس تارتتى.

ايتا كەتەيىك، 3 جەلتوقساندا كەشكە وڭتۇستىك كورەيا پرەزيدەنتى يۋن سوك ەل ەلدە اسكەري جاعداي ەنگىزدى.

بۇل شەشىم وپپوزيسيالىق دەموكراتيالىق پارتيا پارلامەنتتە قىسقارتىلعان بيۋدجەت تۋرالى زاڭ جوباسىن قولداپ، مەملەكەتتىك اۋديتور مەن باس پروكۋرورعا يمپيچمەنت جاريالاۋ تۋرالى ءوتىنىش بەرگەننەن كەيىن قابىلداندى. الايدا وڭتۇستىك كورەيانىڭ ۇلتتىق اسسامبلەياسى ەلدە اسكەري جاعداي ەنگىزۋگە قارسى داۋىس بەردى.

وسىلايشا اسكەري جاعدايدى جويۋدى تالاپ ەتكەن ازاماتتار اسكەري ادامدارمەن جانە پوليسيامەن قاقتىعىسىپ قالدى. سەۋل كوشەلەرىندە اسكەري تەحنيكا پايدا بولدى.

كەيىن ەل پرەزيدەنتى اسكەري جاعدايدى الىپ تاستايتىنىن مالىمدەدى.

اراعا ۇزاق ۋاقىت سالماي ەل پرەزيدەنتى اسكەري جاعداي ەنگىزگەنى ءۇشىن حالىقتان كەشىرىم سۇرادى. ول بۇدان بىلاي مۇنداي قادامدارعا بارماۋعا ۋادە بەردى.

"شىن كوڭىلدەن حالىقتان كەشىرىم سۇرايمىن"، - دەدى ول.

ەل پرەزيدەنتىنىڭ ايتۋىنشا، مۇنداي شاراعا ءماجبۇرلى تۇردە بارعان.

"اسكەري جاعداي جاريالاۋعا بايلانىستى جاۋاپكەرشىلىكتەن جالتارمايمىن"، - دەدى ول.

قازاقستاننىڭ وڭتۇستىك كورەياداعى ەلشىلىگى قازاقستاندىقتارعا ۇندەۋ جاسادى.

"كورەيا رەسپۋبليكاسى پرەزيدەنتى يۋن سوك ەل اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان ازاماتتارىن سابىر ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز"، — دەپ جازىلعان حابارلامادا.