Qazaqstan Syrtqy ister ministriniń orynbasary Álibek Baqaev Ońtústik Koreia men Grýziiadaǵy qazaqstandyqtarǵa qatysty pikir bildirdi, dep habarlaidy Dalanews.kz.
Onyń sózinshe, Ońtústik Koreiada 30 myńǵa jýyq Qazaqstan azamaty júr.
“Elshilikterimiz sheteldegi azamattarymyzben únemi bailanysta bolady. Negizi bul saiasi másele sheshimin taýyp jatyr. Biz basqa elderdiń ishki saiasatyna bas suǵa almaimyz. Qazirgi tańda basty maqsatymyz — Ońtústik Koreiada turatyn azamattarymyzdy qorǵaý. Ózderińiz biletindei, búgingi tańda Koreiamen biznes rejim ornatylǵan. Sondyqtan Qazaqstan azamattarynyń sany 30 myńnan asady. Taǵy bir aityp ótetin jaǵdai, keibir azamattarymyz ishki migratsiianyń erejesin buzyp júr. Iaǵni, zańsyz júrgenderi de bar. Sol sebepti bul máseleni eki jaqty sheshýge tyrysyp otyrmyz. Búgingi tańda Eńbek ministrligi, Syrtqy ister ministrligi arnaiy jumystar júrgizip jatyr”, — dep jaýap berdi ol Ulysmedia.kz tilshisiniń suraǵyna.
Sonymen qatar sheneýnik Koreiada ustalǵan Qazaqstan azamattarynyń joq ekenin atap ótti.
“Ondai jaǵdai bolǵan kezde Qazaqstan azamattaryna birden aqparat beremiz. Sonymen qatar usynys ta joldaimyz”, — dedi Baqaev.
Aitýynsha, Grýziiamen vizasyz rejim bolǵannan keiin onda qansha azamat júrgeni belgisiz.
“Grýziiadan naqty qansha azamat bar ekenin kesip aita almaimyn. Grýziiada vizasyz rejim engizilgen. Sondyqtan kóbi demalysqa nemese basqa da sebeptermen barady. Ońtústik Koreiadaǵy jaǵdaidy aityp ketkenimdei, Grýziiadaǵy elshiligimiz bul máseleni baqylaýda ustap otyr. Biz kez kelgen qazaqstandyqqa kómek kórsetemiz jáne jelilerimiz árdaiym ashyq. Sondyqtan shetelde qiyndyqqa tap bolǵan kez kelgen azamat Syrtqy ister ministrliginen kómek surai alady”, — dep atap ótti ol.
Aita ketsek, Iýn Sok Iol 3 jeltoqsanda keshke elde tótenshe áskeri jaǵdai engizgen bolatyn. Bul sońǵy 45 jylda Ońtústik Koreia basshylyǵy tarapynan engizilgen alǵashqy áskeri jaǵdai boldy.
Kóp uzamai Seýldegi Ulttyq assambleia ǵimaratynyń aldynda narazylyq bildirýshiler jinalyp, politsiia parlament ǵimaratyna kirý joldaryn jaýyp tastady. Qala kóshelerinde áskeri tehnika paida boldy.
Birneshe saǵattan keiin 300 depýtattyń 190-y parlamentke kirip, áskeri tótenshe jaǵdaidy toqtatý úshin daýys berdi. Oppozitsiia jetekshisi Li Dje Men prezidenttiń sheshimin “konstitýtsiiaǵa qaishy” dep atap, ony “halyqqa qarsy áreket” dep synǵa aldy.
Al Qazaqstannyń Koreiadaǵy elshiligi eldegi áskeri tótenshe jaǵdaiǵa qatysty málimdeme jasaǵan bolatyn.
Koreia Respýblikasy prezidenti Iýn Sok Eldiń áskeri jaǵdai engizýine bailanysty Koreia Respýblikasynda júrgen Qazaqstan Respýblikasynyń azamattaryn sabyrlyq saqtap, jergilikti biliktiń usynystaryn oryndaýǵa jáne kópshilik is-sharalardan aýlaq bolýǵa shaqyramyz.
Qazaqstan Respýblikasynyń azamattary úshin tótenshe jaǵdai týyndaǵan jaǵdaida, jedel bailanys úshin +8210-6572-9311telefony arqyly elshilikke habarlasýlaryńyzdy suraimyz!, - delingen elshilik taratqan habarlamada.
