قازاقستان سىرتقى ىستەر ءمينيسترىنىڭ ورىنباسارى الىبەك باقايەۆ وڭتۇستىك كورەيا مەن گرۋزياداعى قازاقستاندىقتارعا قاتىستى پىكىر ءبىلدىردى، دەپ حابارلايدى Dalanews.kz.

ونىڭ سوزىنشە، وڭتۇستىك كورەيادا 30 مىڭعا جۋىق قازاقستان ازاماتى ءجۇر. 

“ەلشىلىكتەرىمىز شەتەلدەگى ازاماتتارىمىزبەن ۇنەمى بايلانىستا بولادى. نەگىزى بۇل ساياسي ماسەلە شەشىمىن تاۋىپ جاتىر. ءبىز باسقا ەلدەردىڭ ىشكى ساياساتىنا باس سۇعا المايمىز. قازىرگى تاڭدا باستى ماقساتىمىز — وڭتۇستىك كورەيادا تۇراتىن ازاماتتارىمىزدى قورعاۋ. وزدەرىڭىز بىلەتىندەي، بۇگىنگى تاڭدا كورەيامەن بيزنەس رەجيم ورناتىلعان. سوندىقتان قازاقستان ازاماتتارىنىڭ سانى 30 مىڭنان اسادى. تاعى ءبىر ايتىپ وتەتىن جاعداي، كەيبىر ازاماتتارىمىز ىشكى ميگراسيانىڭ ەرەجەسىن بۇزىپ ءجۇر. ياعني، زاڭسىز جۇرگەندەرى دە بار. سول سەبەپتى بۇل ماسەلەنى ەكى جاقتى شەشۋگە تىرىسىپ وتىرمىز. بۇگىنگى تاڭدا ەڭبەك مينيسترلىگى، سىرتقى ىستەر مينيسترلىگى ارنايى جۇمىستار جۇرگىزىپ جاتىر”، — دەپ جاۋاپ بەردى ول Ulysmedia.kz ءتىلشىسىنىڭ سۇراعىنا. 

سونىمەن قاتار شەنەۋنىك كورەيادا ۇستالعان قازاقستان ازاماتتارىنىڭ جوق ەكەنىن اتاپ ءوتتى. 

“ونداي جاعداي بولعان كەزدە قازاقستان ازاماتتارىنا بىردەن اقپارات بەرەمىز. سونىمەن قاتار ۇسىنىس تا جولدايمىز”، — دەدى باقايەۆ.

ايتۋىنشا، گرۋزيامەن ۆيزاسىز رەجيم بولعاننان كەيىن وندا قانشا ازامات جۇرگەنى بەلگىسىز.

“گرۋزيادان ناقتى قانشا ازامات بار ەكەنىن كەسىپ ايتا المايمىن. گرۋزيادا ۆيزاسىز رەجيم ەنگىزىلگەن. سوندىقتان كوبى دەمالىسقا نەمەسە باسقا دا سەبەپتەرمەن بارادى. وڭتۇستىك كورەياداعى جاعدايدى ايتىپ كەتكەنىمدەي، گرۋزياداعى ەلشىلىگىمىز بۇل ماسەلەنى باقىلاۋدا ۇستاپ وتىر. ءبىز كەز كەلگەن قازاقستاندىققا كومەك كورسەتەمىز جانە جەلىلەرىمىز ءاردايىم اشىق. سوندىقتان شەتەلدە قيىندىققا تاپ بولعان كەز كەلگەن ازامات سىرتقى ىستەر مينيسترلىگىنەن كومەك سۇراي الادى”، — دەپ اتاپ ءوتتى ول.

ايتا كەتسەك، يۋن سوك ءول 3 جەلتوقساندا كەشكە ەلدە توتەنشە اسكەري جاعداي ەنگىزگەن بولاتىن. بۇل سوڭعى 45 جىلدا وڭتۇستىك كورەيا باسشىلىعى تاراپىنان ەنگىزىلگەن العاشقى اسكەري جاعداي بولدى.

كوپ ۇزاماي سەۋلدەگى ۇلتتىق اسسامبلەيا عيماراتىنىڭ الدىندا نارازىلىق بىلدىرۋشىلەر جينالىپ، پوليسيا پارلامەنت عيماراتىنا كىرۋ جولدارىن جاۋىپ تاستادى. قالا كوشەلەرىندە اسكەري تەحنيكا پايدا بولدى.

بىرنەشە ساعاتتان كەيىن 300 دەپۋتاتتىڭ 190-ى پارلامەنتكە كىرىپ، اسكەري توتەنشە جاعدايدى توقتاتۋ ءۇشىن داۋىس بەردى. وپپوزيسيا جەتەكشىسى لي دجە مەن پرەزيدەنتتىڭ شەشىمىن “كونستيتۋسياعا قايشى” دەپ اتاپ، ونى “حالىققا قارسى ارەكەت” دەپ سىنعا الدى.

ال قازاقستاننىڭ كورەياداعى ەلشىلىگى ەلدەگى اسكەري توتەنشە جاعدايعا قاتىستى مالىمدەمە جاساعان بولاتىن.

كورەيا رەسپۋبليكاسى پرەزيدەنتى يۋن سوك ەلدىڭ اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان رەسپۋبليكاسىنىڭ ازاماتتارىن سابىرلىق ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز. 

قازاقستان رەسپۋبليكاسىنىڭ ازاماتتارى ءۇشىن توتەنشە جاعداي تۋىنداعان جاعدايدا، جەدەل بايلانىس ءۇشىن +8210-6572-9311تەلەفونى ارقىلى ەلشىلىككە حابارلاسۋلارىڭىزدى سۇرايمىز!، - دەلىنگەن ەلشىلىك تاراتقان حابارلامادا.