Almaty ákimdigi men QR Memlekettik qyzmet isteri agenttiginiń departamenti birlesip, qala ákimi Erbolat Dosaevtyń tóraǵalyǵymen óńirlik kadrlyq komissiianyń otyrysyn ótkizdi. Otyrysta óńirlik kadrlyq rezervke úmitkerlerdi irikteýdiń sońǵy kezeńi ótti, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Oblystar men respýblikalyq mańyzy bar qalalardyń óńirlik kadrlyq rezervine irikteýdiń birinshi kezeńi 1 naýryzda bastalǵan bolatyn. Úmitkerler bes kezeńnen ótýi tiis boldy. Irikteýge 35 jasqa deiingi, joǵary bilimi bar jáne keminde 3 jyl jumys ótili bar Qazaqstan Respýblikasynyń azamattary qatysa alady. Almaty qalasy boiynsha birinshi kezeńde 261 úmitker qujat tapsyrsa, sońǵy kezeńge 43 úmitker jiberildi.
Qala ákimi Erbolat Dosaev finaldyq kezeńge ótken úmitkerlerdi quttyqtap, sáttilik tiledi: olar buǵan deiin zańnamany bilý, jeke qasietter men quzyretterdi baǵalaý boiynsha testileýden sátti ótken edi.
– El Prezidenti Qasym-Jomart Toqaev daryndy ári maqsat qoia biletin jastar úshin áleýmettik liftiniń mańyzdylyǵyn birneshe ret aitqan. Bizdiń óńirlik kadrlyq rezervimiz úmitkerlerimiz úshin osyndai lift bolatynyna senimdimin, – dedi Almaty ákimi.
Kelesi kezeńde «qurylymdyq suhbat» barysynda úmitkerler ózderiniń usynylǵan ideialarynyń, qyzyqty jobalarynyń máni men maqsatyn, olardy júzege asyrý kezeńderin, yqtimal máselelerdi, kútiletin nátijeler men olardy sheshý joldaryn ashyp kórsetti.
Irikteý qorytyndysy boiynsha 30 rezervist óńirlik kadrlyq rezervke qabyldanady, olar eki jyl ishinde qaladaǵy jergilikti atqarýshy organdaǵy túrli bos laýazymdarǵa baiqaýsyz taǵaiyndalýǵa úmitker bola alady.
Óńirlik komissiia tóraǵasynyń orynbasary – QR Memlekettik qyzmet isteri agenttigi departamentiniń basshysy Álimhan Shynarai, al komissiia quramyna qalalyq máslihattyń tóraǵasy Meiirjan Otynshiev, Almaty qalasy boiynsha Tekserý komissiianyń tóraǵasy Altai Berdiqulov jáne qala ákimi apparatynyń basshysy Aidar Jaqybaev kirdi.
Komissiia jumysynyń ashyqtyǵyn qamtamasyz etý maqsatynda irikteýdiń sońǵy kezeńinde Memlekettik qyzmet isteri departamenti táýelsiz salalyq sarapshylardy shaqyrǵan. Sarapshylar úmitkerler úshin irikteýdiń ashyq jáne ádil ótýin qamtamasyz etkenin atap ótti.
