Túrkistan qalasynda «Ónerli ólke» óner festivali aiasynda Tólebi aýdanynyń mádeniet kúnderi óz máresine jetti. Túrkistan tórindegi eki kúnge sozylǵan shara gala-kontsertpen qorytyndylandy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Merekelik sharada aýdan ónerpazdarynyń áni shyrqalyp, myń buralǵan bishiler kópshiliktiń qoshemetine bólendi. Sondai-aq, kórermen arasynda karaoke uiymdastyrylyp, keshtiń sánin keltirdi.
Erekshe sáttiń kýási bolǵan kórermen dán rizashylyqtaryn bildirip, keshten qimai tarqasty.
Aita keteiik, Tólebi aýdanynyń mádeniet kúnderi eki kún boiy jalǵasty. Alǵashqy kúni Etnoaýylda «Qasietti de, kieli qolónerim» qolóner sheberleriniń kórmesi, tsirk janryndaǵy qoiylymdar, qylqalam sheberleriniń sýret kórmesi, Qazaqstan Sýretshiler odaǵynyń múshesi Erkin Aitbaevtyń jáne sýretshi, ónertaný ǵylymdarynyń doktory Dildabai Kemeshovtyń týyndylary, qolóner sheberleriniń sheberlik saǵaty (qaǵazdan sebetter jasaý, kilemshe toqý, sazdan qumyra jasaý t.b) ótti.
Budan bólek, «Kásip bolmai, násip bolmas» aýylsharýashylyǵy ónimderiniń jármeńkesi, ulttyq kóne salt-dástúr, ádet-ǵuryp kórinisteri somdaldy.
Al ekinshi kúni Etnoaýylda «Ult qazynasy» atty ulttyq oiyndardan jarystar ótti. Ulttyq sport túrlerin nasihattaý maqsatynda qazaqsha kúres, aýdaryspaq, qoshqar kóterý, gir kóterý, qol kúres, sadaq atý, toǵyzqumalaq syndy t.b oiyndaryna jurtshylyq belsene qatysty. «Ónerli ólke» aýdandyq, qalalyq saz mektebiniń kontserttik baǵdarlamasy usynyldy.
