تۇركىستان قالاسىندا «ونەرلى ولكە» ونەر فەستيۆالى اياسىندا تولەبي اۋدانىنىڭ مادەنيەت كۇندەرى ءوز مارەسىنە جەتتى. تۇركىستان تورىندەگى ەكى كۇنگە سوزىلعان شارا گالا-كونسەرتپەن قورىتىندىلاندى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
مەرەكەلىك شارادا اۋدان ونەرپازدارىنىڭ ءانى شىرقالىپ، مىڭ بۇرالعان بيشىلەر كوپشىلىكتىڭ قوشەمەتىنە بولەندى. سونداي-اق، كورەرمەن اراسىندا كاراوكە ۇيىمداستىرىلىپ، كەشتىڭ ءسانىن كەلتىردى.
ەرەكشە ءساتتىڭ كۋاسى بولعان كورەرمەن ءدان ريزاشىلىقتارىن ءبىلدىرىپ، كەشتەن قيماي تارقاستى.
ايتا كەتەيىك، تولەبي اۋدانىنىڭ مادەنيەت كۇندەرى ەكى كۇن بويى جالعاستى. العاشقى كۇنى ەتنواۋىلدا «قاسيەتتى دە، كيەلى قولونەرىم» قولونەر شەبەرلەرىنىڭ كورمەسى، سيرك جانرىنداعى قويىلىمدار، قىلقالام شەبەرلەرىنىڭ سۋرەت كورمەسى، قازاقستان سۋرەتشىلەر وداعىنىڭ مۇشەسى ەركىن ايتبايەۆتىڭ جانە سۋرەتشى، ونەرتانۋ عىلىمدارىنىڭ دوكتورى ءدىلداباي كەمەشوۆتىڭ تۋىندىلارى، قولونەر شەبەرلەرىنىڭ شەبەرلىك ساعاتى (قاعازدان سەبەتتەر جاساۋ، كىلەمشە توقۋ، سازدان قۇمىرا جاساۋ ت.ب) ءوتتى.
بۇدان بولەك، «كاسىپ بولماي، ءناسىپ بولماس» اۋىلشارۋاشىلىعى ونىمدەرىنىڭ جارمەڭكەسى، ۇلتتىق كونە ءسالت-داستۇر، ادەت-عۇرىپ كورىنىستەرى سومدالدى.
ال ەكىنشى كۇنى ەتنواۋىلدا «ۇلت قازىناسى» اتتى ۇلتتىق ويىنداردان جارىستار ءوتتى. ۇلتتىق سپورت تۇرلەرىن ناسيحاتتاۋ ماقساتىندا قازاقشا كۇرەس، اۋدارىسپاق، قوشقار كوتەرۋ، گىر كوتەرۋ، قول كۇرەس، ساداق اتۋ، توعىزقۇمالاق سىندى ت.ب ويىندارىنا جۇرتشىلىق بەلسەنە قاتىستى. «ونەرلى ولكە» اۋداندىق، قالالىق ساز مەكتەبىنىڭ كونسەرتتىك باعدارلاماسى ۇسىنىلدى.
