Búgin arnaiy brifing barysynda "Samuryq-Qazyna" UÁQ» AQ-nyń Damý jáne jekeshelendirý jónindegi basqarýshy direktory Saltanat Sátjan Joǵary aýditorlyq palata qorǵa aýdit júrgizip jatqanyn rastady. Onyń aitýynsha, aýdit bir aiǵa sozylady dep kútiledi. Saltanat Sátjan aýdit bireýdi jazalaý úshin emes, qordaǵy jumys protsesterin jaqsartý maqsatynda jasalyp jatqanyn naqtylady, dep habarlaidy Dalanews.kz.
"Syiaqylar men bonýstar júiesi qyzmettiń korporativtik kórsetkishterin oryndaý deńgeiine sai qurylǵan, iaǵni jyl saiyn direktorlar keńesi qor menedjmenti aldyna qoiǵan mindetterdi oryndaý boiynsha qyzmettiń negizgi kórsetkishteri belgilenedi. Soǵan qol jetkizý deńgeii boiynsha sheshim qabyldanady. Jyl ótti me, tiimdilik kórsetkishteri tekseriledi: oǵan qol jetkizildi me, álde joq pa degen turǵyda. Osydan keiin direktorlar keńesi menedjmentti marapattaý nemese bonýs taǵaiyndaý-taǵaiyndamai týraly sheshim qabyldaidy. Bul álemdik tájiribede keńinen qoldanysqa ie eń utymdy tásil, mundaida menedjmenttiń naqty maqsattary men qandai nátije shyǵarýy kerektigi túsinikti bolady. Direktorlar keńesi muny tiisti standarttarǵa sai baǵalaýy kerek bolady", - dedi ol.
Saltanat Sátjan "Samuryq-Qazyna" ózin ashyq jáne transparentti uiym dep sanaidy, sondyqtan kez kelgen tekserýge daiyn ekenin aitady. Alaida menedjmenttiń syiaqysy men bonýstarǵa bólinetin somalarǵa qatysty saýalǵa ol bul aqparat qupiia bolyp tabylatyndyqtan ony jariia ete almaitynyn jetkizdi.
"Qazaqstan Zańyna jáne bizdiń aqparatty berý jónindegi erejelerimizge sáikes, bul týraly aita almaimyn. Biraq jyl saiyn qordyń qarjylyq esebi jariialanyp otyrady. Sondyqtan bul málimetti sodan taýyp alýǵa bolady. Al qordyń 2024 jylǵy qarjylyq esebi áli jariialanbaǵan. Meniń oiymsha, ol jýyrda jariialanyp qalady", - dep atap ótti ol.
Aita ketsek, "Samuryq-Qazyna" ulttyq ál-aýqat qorynda reforma júrip jatqanyna biraz boldy. Alaida, biyl, 2025 jyly 27 qańtarda ótken Úkimettiń keńeitiligen otyrysynda Memleket basshysy atalǵan reformalaý barysyna kóńili tolmaitynyn jetkizdi, sóitip aqpan aiynda bul máseleni mai-shammen qaraitynyn aitqan. Al 21 aqpanda Prezident Joǵary aýditorlyq palata tóraǵasy Álihan Smailovty qabyldaǵanda "Samuryq-Qazyna" men birqatar ulttyq kompaniialarlarǵa aýditorlyq tekseris júrgiziletini de belgili boldy. Májilis qabyrǵasynda 2025 jyly 19 mamyrda depýtat Ádil Jubanov "Samuryq-Qazyna" qoryn taratýdy usyndy. Ol bir de bir otbasy múshesi kásipkerlikpen ainalyspaǵan, biraq bizde óte bai turatyn azamattardy biletinin, urlaýǵa yńǵaily bolý úshin barlyq bailyqty bir qolǵa ustatyp qoiǵanymyzdy aita kele, "Samuryq-Qazyna" qyzmetine qarsy ekenin, ony taratyp, básekelestik ortaǵa berý qajettigin aitty. Qarjyger-maman Iliias Isaev qor tarasa, eski Qazaqstannyń da dáýiri támamdalatyn siiaqty dep sanaidy. Qarjygerdiń pikirinshe, shetelge toqtamai, aǵylyp ketip jatqan aqshanyń artynda osy "úlken qus" turǵan sekildi. Al kúni keshe Májiliste esep bergen Joǵary palata tóraǵasy Álihan Smaiylov "Samuryq-Qazyna" qoryna aýdit júrgizilip jatqanyn, sonyń ishinde qor top-menedjerleriniń alǵan bonýstarynyń zańdy-zańsyzdyǵy da tekseriletinin aitty.
