Túrkistan ǵasyrlar boiy Qazaq handyǵynyń saiasi jáne rýhani ómiriniń júregi bolǵan edi. Búginde ejelgi qalanyń qarqyndy ósý kezeńin búkil álem baqylap otyr. Al bul rette týrizm salasyn damytýǵa erekshe kóńil bólinip jatyr. Sońǵy jyldary qalada myńdaǵan jumys oryndary ashyldy. Mysaly, «Kerýen-Sarai» kópfýnktsionaldy kesheniniń ózinde turaqty túrde tórt myńnan astam adam eńbek etedi.
Bul týraly QR Mádeniet jáne sport ministri Aqtoty Raiymqulova óziniń alǵy sózinde: «Týrizmniń óńir ekonomikasyna qosqan úlesi artyp keledi. Osy rette Halyqaralyq týrizm jáne qonaqjailylyq ýniversiteti kásibi oqytylǵan kadrlarmen qamtamasyz etetini qýantady» dep atap ótti.
– Túrkistannyń damýy – Elbasynyń nazarynda. Elimizdiń Tuńǵysh Prezidentiniń kúndelikti baqylaýynyń arqasynda, Memleket basshysynyń qoldaýymen qurylys jumystary qarqyndy júrip jatyr. Búgingi shara eń aldymen, ekijaqty jáne kópjaqty yntymaqtastyqty odan ári nyǵaitýǵa baǵyttalǵan. Iasaýi kesenesine ziiarat etip kelýshiler sany kún saiyn artyp, 1 mln-nan asty. Aldaǵy ýaqytta olardyń qatary 5 mln-ǵa jetedi. Qasietti mekende arheologiialyq týrizm, etnotýrizm sekildi týrizmniń kóptegen túrlerin damytýǵa múmkindik bar, – dedi Túrkistan oblysynyń ákimi Ómirzaq Shókeev.
– Jaqynda ǵana zańnamalyq ózgerister qabyldanyp, týrizm salasynda investorlar men kásipkerler úshin keń aýqymdy múmkindikter beretin júieli sharalar engizildi. Bul sharalar 2019 jyly qabyldanǵan memlekettik baǵdarlamany tolyqtyrady. Onyń aiasynda qasietti Túrkistan qalasyna kiretin TOP-10 týristik destinatsiiany damytý kózdeldi, – dep atap ótti forýmnyń moderatory, QR Mádeniet jáne sport vitse-ministri Ǵabidolla Ábdirahymov.
Forým aiasynda qatysýshylar óńiraralyq jáne halyqaralyq kooperatsiianyń jańa nysandaryn damytý, ásirese transshekaralyq baǵyttardy qurý máselelerin talqylady. Al kezdesý qorytyndysy boiynsha qazaqstandyq jáne ózbek týroperatorlary arasynda Uly Jibek joly boiynda jańa týristik ónimderdi qalyptastyrý boiynsha yntymaqtastyq týraly birqatar memorandýmdarǵa qol qoiyldy.
Transshekaralyq marshrýttardyń geografiiasyn odan ári keńeitý maqsatynda qatysýshylar aldaǵy ýaqytta TOP-10 kiretin basqa destinatsiialarda, mysaly, Aqtaý nemese Býrabai syndy kýrorttyq aimaqtarda da osyndai kezdesýler ótkizbek.
Forýmnyń qorytyndy bóliminde tanymal qazaqstandyq kaskader Jaidarbek Kúnǵojinov pen alpinister quramasynyń kapitany Maqsut Jumaevqa QR Týrizm elshileriniń arnaiy belgileri tabys etildi.
