Agrarlyq salanyń damýyna tereń mán beretin Memleket basshysy Qasym-Jomart Toqaevtyń tapsyrmasyna sáikes óńirde sýarmaly jerlerdi 3 mln gektarǵa deiin ulǵaitý kózdelgen.
– Osy baǵyttaǵy Túrkistan oblysynyń jasap jatqan jumystarynyń bárin úlgi retinde alýǵa bolady. Sóz joq, sýarmaly jerler kepildi mol ónim beretin, qaitarymy joǵary, aýyl sharýashylyǵynyń «altyn qory» ǵana emes, ol – sol óńirlerde turatyn halyqtyń tirshiligi, áleýmettik jaǵdaiy, taǵdyry dep aitsaq ta bolady. Elimizdegi sýarmaly eginshilik aýmaǵy jalpy igerilgen jerlerdiń 8 paiyzynan aspaidy, al odan alynǵan ónim jalpy aýyl sharýashylyǵy óniminiń 35 paiyzyn quraidy. Sondyqtan da Memleket basshysynyń tapsyrmasyna sáikes sýarmaly jerlerdi kezeń-kezeńimen 3 mln. gektarǵa deiin ulǵaitýdy qamtamasyz etý maqsatynda 2030 jylǵa deiin gidromelioratsiialyq júieler men 38 jańa sý qoimalaryn salý boiynsha is-sharalar ázirlenip jatqan Sý resýrstaryn basqarý jónindegi ulttyq joba aiasynda iske asyrylmaq, – dedi kóshpeli otyrysty ashqan Senattyń Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń tóraǵasy Áli Bektaev.
Komitet tóraǵasy eldegi irrigatsiialyq infraqurylymnyń jai-kúii syn kótermeitinin de atap ótti. Respýblikalyq menshiktegi jalpy uzyndyǵy 19 772 shaqyrymdyq 3298 kanaldyń 11881 shaqyrymy qanaǵattanarlyqsyz jaǵdaida. Sharýashylyqaralyq jáne sharýashylyqishilik kanaldardyń 80-90% eskirgen, tehnikalyq deńgeii tómen. Osyǵan bailanysty irrigatsiialyq júielerdi qalpyna keltirý úshin aýqymdy jumystar atqarylmaq.
Túrkistan oblysy aýyl sharýashylyǵynyń bai aimaqtarynyń birine jatady. Respýblikadaǵy sýarmaly jerlerdiń 3/1 bóligi oblysqa tieseli (548,2 myń gektar) jáne 70 myń agroqurylymdarda 180 myńǵa jýyq adam eńbek etýde. Túrkistan oblysynyń ákimi Ómirzaq Shókeev sýarmaly jerlerdi tiimdi paidalaný máselelerine toqtalyp, osy baǵyttaǵy atqarylyp jatqan isterimen, aldaǵy josparlarymen tanystyryp ótti.
– Búgingi kóshpeli otyrysta qaralyp otyrǵan kún tártibiniń Túrkistan oblysy úshin mańyzdylyǵy joǵary. Túrkistan qalasy aýmaǵyndaǵy aýdandarda aǵyn sý tapshylyǵyn sheshý maqsatynda, iri sý nysandarynyń qurylysyn júrgizýdemiz. Onyń ishinde, «Túrkistan magistraldy kanalynda kúrdeli jóndeý», «Keńsai – Qosqorǵan-2» sý qoimasyn salý, «Jetikól kólder júiesin jańǵyrtý» jobasy júzege asyrylýda. Budan bólek, aǵyn sý tapshylyǵynyń táýekeldiligi áli de joǵary ekendigin eskerip, «Syrdariia ózeninen mashinalyq arna salý» jáne «Sarqyrama» sý qoimasyn salý jobalary ázirlenýde. Bul jobalar Túrkistan óńirin kepildi aǵyn sýmen qamtamasyz etetin bolady. Qurmetti Senat depýtattary! Elbasynyń tikelei bastamasymen, Túrki tildes el basshylarynyń qoldaýymen, Túrkistan qalasyn rýhani astana retinde damýyna airyqsha kóńil bólinip otyrǵandyqtan, joǵaryda atalyp ótken sý nysandarynyń qurylysyn aiaqtaý – kezek kúttirmes másele. Osyǵan orai, Respýblikalyq deńgeidegi máselelerdi Sizdermen birlese otyryp sheshetindigimizge úlken senimmen qaraimyn! – dedi oblys ákimi Ómirzaq Shókeev.
– Jergilikti deńgeide sý nysandaryn tiimdi paidalaný Ordabasy, Otyrar, Báidibek, Saýran aýdandary men Arys, Kentaý qalalaryn 78,8 myń ga sýarmaly sýmen ýaqtyly qamtamasyz etýge múmkindik beredi. Biyl sý salasyn damytýǵa oblystyq biýdjetten 3,7 mlrd teńge bólindi. Osy qarajatqa 361 shaqyrymdyq sý obektilerine kúrdeli jáne aǵymdaǵy jóndeý júrgizildi. Oblys ákiminiń qoldaýymen Jetisai aýdanyna basymdyq berildi, onda kommýnaldyq menshiktegi uzyndyǵy 241 km barlyq 121 kanalǵa mehanikalyq tazalaý júrgiziledi, – dedi U.Tájibaev.
Qazaqstan Respýblikasy Aýyl sharýashylyǵy vitse-ministri Rýslan Manataev Qazaqstan Respýblikasyndaǵy sýarmaly jerlerdi damytý máseleleri, Qazaqstan Respýblikasy Ekologiia, geologiia jáne tabiǵi resýrstar vitse-ministri Serik Qojaniiazovtyń Qazaqstan Respýblikasynyń sý qoryn paidalaný men ony qorǵaý máseleleri týraly, «Qazsýshar» RMK Bas direktory mindetin atqarýshy Altai Eljasovtyń respýblikalyq menshiktegi sý sharýashylyǵy obektilerin paidalaný jáne kútip-ustaý, sýarmaly sý berýdiń aǵymdaǵy jaǵdaiy, Túrkistan oblysy ákiminiń orynbasary Ulan Tájibaevtyń Túrkistan oblysynda sýarmaly jerlerdi damytý perspektivalary men máseleleri týraly aqparattarymen tanystyrdy.
Qoiylǵan suraqtarǵa tiisti memlekettik organnyń basshylary jaýap berdi.
