Qazaqstandyq shahmatshy Bibisara Asaýbaeva memleket basshysy Qasym-Jomart Toqaevqa úndeý jasap, kásibi sporttaǵy máseleler men qarjylyq qoldaý tapshylyǵy týraly aitty, dep habarlaidy dalanews.kz.
Álemdik reitingte besinshi orynda turǵan grossmeisterdiń sózinshe, qazirgi tańda onyń aldynda tek tórt qytailyq shahmatshy ǵana bar.
«Men álemdik reitingte besinshi orynda turmyn. Aldymda tek tórt qytailyq bar. Qalǵan álemniń bárin artta qaldyrdym», – dedi sportshy.
Bibisara Asaýbaeva jaqynda ǵana bedeldi Norway Chess týrnirinde merziminen bir ainalym buryn chempion atanǵanyn eske saldy. Onyń aitýynsha, jarysqa daiyndyq jeke júlde qorynan jáne ata-anasynyń qarajaty esebinen júrgizilgen.
Shahmatshynyń aitýynsha, týrnirge kómektesken sekýndanttar men analitikterdiń eńbekaqysy áli kúnge deiin tólenbegen.
Ol prezidenttiń ózin eldiń «altyn qoryna» jatqyzǵanyn eske alyp, jetistikterdiń úlken eńbekpen keletinin aitty.
«Meniń medaldarym orasan eńbekpen, densaýlyqpen jáne tózimmen keledi. Barlyq kedergilerge qaramastan, elimizdiń abyroiy men týyn biik ustap kelemin», – dedi Asaýbaeva.
Sportshynyń málimdeýinshe, shahmattan álem chempionatyn jeńgeni úshin beriletin syiaqy kólemi nebári 2 myń dollardy quraidy. Al Olimpiada júldegerleri úshin bul kórsetkish 250 myń dollarǵa jetedi.
«Qazaqstanda mennen basqa eresekter arasynda álem chempiony atanǵan shahmatshy joq», – dedi ol.
Asaýbaevanyń aitýynsha, 2023 jyly álem chempionatyndaǵy ekinshi altyn medalinen keiin oǵan Sport ministrligi jelisi boiynsha ai saiyn 1 million teńge kóleminde jalaqy tólengen. Alaida 2025 jyly ministr Erbol Myrzabosynov qyzmetke kelgennen keiin bul tólem úsh esege qysqarǵan.
Sonymen qatar shahmatshy Qazaqstan shahmat federatsiiasynan eshqashan jalaqy almaǵanyn málimdedi.
Onyń sózinshe, 2025 jyldyń sońynda blits boiynsha úshinshi márte álem chempiony atanyp, shahmat tájine úmitkerler týrnirine qatysý quqyǵyna ie bolǵan. Biraq bul jetistikke qaramastan, ministrlik tarapynan tólem kólemi ózgermegen.
Bibisara Asaýbaeva biyl qańtar aiynda jattyqtyrýshysymen birge sport ministrimen kezdesip, federatsiiaǵa bólingen qarjynyń jetkiliksiz ekenin jetkizgenin aitty.
«Ministr "Sport qory" arqyly júz paiyz kómektesemiz dep ýáde berdi», – dedi ol.
Shahmatshynyń aitýynsha, keiin qorǵa ótinim berilgenimen, qajetti qarajattyń tek bir bóligi ǵana bólingen. Sonyń saldarynan sekýndanttar qashyqtan jumys isteýge májbúr bolǵan.
«Men osyndai mańyzdy jarysqa sekýndanttaryn alyp kele almaǵan jalǵyz shahmatshy boldym», – dedi sportshy.
Ol úmitkerler týrnirinde ekinshi oryn alǵanyn da atap ótti.
Keiin ministrliktiń usynysymen qorǵa taǵy bir ótinim berilgen. Asaýbaevanyń aitýynsha, vitse-ministr Serik Jaraspaev WhatsApp arqyly qamqorshylyq keńes ótinimdi maquldaǵanyn habarlaǵan. Alaida biraz ýaqyttan keiin qor basshylyǵy ótinimdi sebepsiz keri qaitarǵan. Shahmatshy taǵy bir máselege toqtalyp, ózine 2025 jylǵy 30 jeltoqsanda prezident jarlyǵymen II dárejeli «Barys» ordeni berilgenin, biraq marapatty áli kúnge deiin almaǵanyn aitty.
Onyń sózinshe, Sport ministrliginiń shaqyrýymen marapatty alý úshin Astanaǵa úsh ret barǵanymen, ár sapar keiinge shegerilgen.
«Ókinishke qarai, óz ordenimdi áli kúnge deiin alǵan joqpyn», – dedi ol.
Sondai-aq Asaýbaeva sáýir jáne mamyr ailarynda prezidenttiń atyna úsh hat joldaǵanyn, biraq áli jaýap kelmegenin málimdedi. Hattardyń kóshirmesi ministrge WhatsApp arqyly da jiberilgenimen, jaýap bolmaǵan.
Úndeýiniń sońynda shahmatshy aldaǵy mańyzdy jarystar men oqý-jattyǵý jiyndary aldynda ózin tolǵandyrǵan suraqty qoidy.
«Aldymda úlken jarystar, jiyndar jáne kóp jumys tur. Ne isteýim kerek, prezident myrza?» – dep sózin túiindedi Bibisara Asaýbaeva.
