Qyzylorda oblysynyń Jańaqorǵan aýdanynda qudyqtan 20 jastaǵy jigittiń máiiti tabyldy, dep habarlaidy dalanews.kz.
"Kriminalnyi Kazahstan" telegram arnasynyń málimetinshe, qaiǵyly oqiǵaǵa bailanysty marqumnyń 15 jastaǵy inisi kúdikti retinde ustaldy.
Týystarynyń aitýynsha, jas jigit 30 mamyr kúni keshke úiiniń aýlasynda tóselgen matrasta túnep shyqqan. Alaida tańerteńnen beri habarsyz ketken. Jaqyndary izdeý jumystaryn bastap, kelesi kúni onyń denesin sý qubyryna arnalǵan qudyqtan tapqan.
Marqumnyń anasy ulynyń denesinde zorlyq-zombylyq belgileri bolǵanyn aitady.
"Ulym qyzyl tústi jaimaǵa oralǵan kúide tabyldy. Moinynda tunshyqtyrý izderi boldy. Denesiniń ár jerinde kógergen jerlerdi baiqadym. Onyń ómiri úshin kúreskeni anyq kórinedi. Mundai áreketti bir adamnyń jasaýy qiyn dep oilaimyn", – deidi ol.
Marqumnyń týystary 15 jastaǵy jasóspirimniń jalǵyz ózi 20 jastaǵy jigitke kúsh kórsete alatynyna kúmán keltiredi. Olardyń pikirinshe, oqiǵaǵa basqa adamdardyń da qatysy bolýy múmkin. Sondai-aq otbasy músheleri qaiǵyly jaǵdaidy buǵan deiin úide bolǵan urlyq oqiǵalarymen bailanystyrýda.
Atalǵan derek boiynsha politsiia "Adam óltirý" baby negizinde qylmystyq is qozǵady. Kúdikti sot sanktsiiasymen qamaýǵa alyndy.
Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan sotqa deiingi tergeý amaldary júrgizilip jatyr. Tergeý múddesine bailanysty ózge aqparat ázirge jariialanǵan joq.
