Jýrnalister sońǵy kezderi bolǵan birneshe jaǵdaidyń EXPO bedelin aitarlyqtai tómendetkenin aityp ótti. Olar mysal retinde kórme nysandarynda túsirilgen videolardy aitty. BAQ ókilderi kórmeniń bedelin qaita kóterý úshin qandai jumystardyń atqarylatynyn surady.
– Bastapqyda-aq, iaǵni jemqorlyq daýy kezinen bastap kórmeniń bedeli túskeni anyq. Men osy qyzmetke kelgende áleýmettik jelilerdiń 80 paiyzynda kórme týraly jaǵymsyz pikirler boldy. Adamdarda sol jaǵymsyz pikir áli kúnge deiin bar. Jaqynda júrgizýshi kelip, qurylys materialdaryn ákelip tastady. Sodan ol qurylys materialdaryn qarap jatqandai bolyp, barlyǵyn videoǵa túsire bastady. Ol bul materialdardyń nege qajet ekenin, ony qaida qoldanatymyzdy bilmei jatyp, videoǵa túsirdi. Biz ol adamdy taptyq. Oǵan bul materialdardyń qandai maqsattarda qoldanylatynyn túsindirip berdik. Ol barlyǵyn túsinip, keshirim surady. Bir jarym jyldyń ishinde mundai jaǵdailarmen kóp kezdestik, – dedi Esimov.
– Men memlekettik qyzmette basqarýshy qyzmetterde jumys isteimin, táýelsizdik jyldaryna deiin de sondai qyzmetterde júrdim dep aitýǵa bolady. Túrli jaǵdailar boldy, kóp syn aityldy, biraq ómirimde birinshi ret bir jarym jyl ishinde osynshama syn estidim. Men mundai jaǵdailarǵa sabyrlyqpen qaraimyn. Jaqsy deitindei onda eshteńe joq. Oryndy syn aitylǵan kezde durys sheshim qabyldaý kerek. Sondyqtan, menińshe, biz jaǵdaidy ýshyqtyrǵan joqpyz. Qazirgi ýaqytta birinshi kezeń boiynsha jumys istep jatyrmyz. Ol qurylys máselesi. Osy kórme arqyly 400 kásiporyn tapsyrys aldy. Olar 414 milliard teńge bolatyn jumysty atqardy. 55 myń jańa jumys orny ashyldy. Bizde júzege asyrylyp jatqan birde-bir memlekettik baǵdarlama osynshalyq jumys ornyn ashqan joq edi. Sondyqtan da men taǵy da aityp óteiin, bul joba osyndai daǵdarysqa óte jaqsy boldy. Bir jaǵynan úlken jumys atqaryldy. Qazir naqty qansha jumys atqarylǵanyn eseptep jatyrmyz, – dedi Esimov.
Onyń aitýynsha, milliardtan asa adam EXPO jaily biledi. «Bizde Qazaqstannyń ishinde de jumystar atqaryldy. Bizdiń telearnalar kúndelikti EXPO jaily aityp jatyr. Rasynda da bul jaqsy nátije berdi. Al jaǵymsyz pikirler jaily aitatyn bolsaq, biz ondai pikirlerdi aitarlyqtai azaita aldyq», – dedi Esimov.
Aita keteiik, EXPO-2017 halyqaralyq kórmesi Astanada 10 maýsymda ashylady.
