Endi Úkimettiń oligarhtyń aldynda búgejikteitindei jóni joq. Eger vitse-premer Roman Skliar Klebanovtyń aldynda bir aýyz sóz aita almai máimóńkeleitin bolsa, vitse-premer bolyp nesi bar?
Ókinishke orai, dál qazir bizdiń Úkimetti qolymen kótere almaityn shoqpardy beline bailap alǵan shendiler kóbeiip ketti.
Eger Smailov Úkimeti Jańa Qazaqstandy qurýǵa shynymen yqylasy bolsa, oligarhatrmen terezesi teń jaǵdaida sóilesýge daǵdylanýy kerek. Óitpeiinshe jaǵdai ózgermeidi. Aldaǵy 4-5 jylda oligapoliiamen kúresý tek Prezident Toqaevtyń mańdaiyna jazylǵan dúnie emes ekenin ministrler men ákimder túsinýi kerek.
Ótkende áleýmettik jelide Aqtóbe qalasnyda kezekti saiabaqtyń ashylýyna oblys ákimi Eraly Toǵjanov oligarh Aleksandr Mashkevichti qudasyndai qushaqtaǵan, al ákimdik qyzmetkerleri baishykeshke quraq ushyp júrgenin búkil qazaq eli kórdi.
Mashkevich osynshama qurmet kórsetetindei Úkimet basshysy ma, álde Prezident pe?
Erterekte Mashkevich bes qarýyn asynǵan oqqaǵarlarymen Pavlodar oblysy ákimdiginiń esgin teýip kiretin bolǵan ǵoi.
Keiinnen Pavlodar oblysyna Ǵalymjan Jaqiianov ákim bolyp taǵaiyndalǵan soń, Mashkevich eski ádetine basyp, eskiten entelei kirgende Jaqiianovtyń nusqaýymen esik aldyndaǵy kúzetshiler oligarhtyń jolyn kes-kestep, oqqaǵarlaryn esiktiń kózinde qaldyryp, ary qarai attap bastyrmaǵan.
Osylaisha, Jaqiianov «yldidan kelip, tór meniki» degen Mashkevichtiń aptyǵan basqan.
Sol siiaqty qazirgi oblys ákimderi men ministrler de oligrhatardyń qolbalasy bolmai, olarmen terezesi teń jaǵdai sóilesýdi ádetke ainaldyrýy kerek.
Kúni keshe ǵana vitse-premer bolǵan dardai shendi Toǵjanovtyń Mashkevti qudasyn kútkendei sán-saltanatpen qarsy alýy talai azamattardyń namysyna tigeni anyq.
Oligarhtardyń shylaýynda ketken shendilerdi kórip, bularmen Jańa Qazaqstandy qurý múmkin emes ekenin birden túsinesiń.
Májilis sailaýy ótkennen keiin jańa Úkimet jasaqtalatyny anyq. Sol kezde Úkimetke oligarhtardyń soiylyn soǵatyn, qudasyndai qushaqtasyp júretin aq jaǵalylardy múlde jolatpaý kerek.
Olardyń ornyna oligarhtardy tairańdatpaityn, olarmen teń dárejeden sóilesetin azamattardy bilikke ákelý kerek. Áitpese ózgeris bolmaidy. Ózgeristiń basy oligarhtarǵa talap qoiyp, ony oryndatýdan bastaldy.
Nurlan JUMAHAN
