پرەزيدەنت توقايەۆ قاڭتار وقيعاسىنان كەيىن ەلىمىزدىڭ ەن بايلىعىن باۋىرىنا باسقان وليگارحتاردى جيناپ، قاتاڭ تالاپ قويعانى ءبارىمىزدىڭ ەسىمىزدە. سول سياقتى سمايلوۆ ۇكىمەتى جىلۋ ورتالىعىن توزدىرىپ، قاقاعان قىستا حالىقتى جىلۋسىز قالدىرعان كلەبانوۆ سىندى وليگارحتارعا قارسى ايبات شەگىپ، ناقتى تالاپ قويۋى كەرەك.

ەندى ۇكىمەتتىڭ وليگارحتىڭ الدىندا بۇگەجىكتەيتىندەي ءجونى جوق. ەگەر ۆيسە-پرەمەر رومان سكليار كلەبانوۆتىڭ الدىندا ءبىر اۋىز ءسوز ايتا الماي مايموڭكەلەيتىن بولسا، ۆيسە-پرەمەر بولىپ نەسى بار؟

وكىنىشكە وراي، ءدال ءقازىر ءبىزدىڭ ۇكىمەتتى قولىمەن كوتەرە المايتىن شوقپاردى بەلىنە بايلاپ العان شەندىلەر كوبەيىپ كەتتى.

ەگەر سمايلوۆ ۇكىمەتى جاڭا قازاقستاندى قۇرۋعا شىنىمەن ىقىلاسى بولسا، وليگارحاترمەن تەرەزەسى تەڭ جاعدايدا سويلەسۋگە داعدىلانۋى كەرەك. ويتپەيىنشە جاعداي وزگەرمەيدى. الداعى 4-5 جىلدا وليگاپوليامەن كۇرەسۋ تەك پرەزيدەنت توقايەۆتىڭ ماڭدايىنا جازىلعان دۇنيە ەمەس ەكەنىن مينيسترلەر مەن اكىمدەر ءتۇسىنۋى كەرەك.

وتكەندە الەۋمەتتىك جەلىدە اقتوبە قالاسنىدا كەزەكتى ساياباقتىڭ اشىلۋىنا وبلىس اكىمى ەرالى توعجانوۆ وليگارح الەكساندر ماشكيەۆيچتى قۇداسىنداي قۇشاقتاعان، ال اكىمدىك قىزمەتكەرلەرى بايشىكەشكە قۇراق ۇشىپ جۇرگەنىن بۇكىل قازاق ەلى كوردى.

ماشكيەۆيچ وسىنشاما قۇرمەت كورسەتەتىندەي ۇكىمەت باسشىسى ما، الدە پرەزيدەنت پە؟

ەرتەرەكتە ماشكيەۆيچ بەس قارۋىن اسىنعان وققاعارلارىمەن پاۆلودار وبلىسى اكىمدىگىنىڭ ەسگىن تەۋىپ كىرەتىن بولعان عوي.

كەيىننەن پاۆلودار وبلىسىنا عالىمجان جاقيانوۆ اكىم بولىپ تاعايىندالعان سوڭ، ماشكيەۆيچ ەسكى ادەتىنە باسىپ، ەسكىتەن ەنتەلەي كىرگەندە جاقيانوۆتىڭ نۇسقاۋىمەن ەسىك الدىنداعى كۇزەتشىلەر وليگارحتىڭ جولىن كەس-كەستەپ، وققاعارلارىن ەسىكتىڭ كوزىندە قالدىرىپ، ارى قاراي اتتاپ باستىرماعان.

وسىلايشا، جاقيانوۆ «ىلديدان كەلىپ، ءتور مەنىكى» دەگەن ماشكيەۆيچتىڭ اپتىعان باسقان.

سول سياقتى قازىرگى وبلىس اكىمدەرى مەن مينيسترلەر دە وليگرحاتاردىڭ قولبالاسى بولماي، ولارمەن تەرەزەسى تەڭ جاعداي سويلەسۋدى ادەتكە اينالدىرۋى كەرەك.

كۇنى كەشە عانا ۆيسە-پرەمەر بولعان دارداي شەندى توعجانوۆتىڭ ماشكيەۆتى قۇداسىن كۇتكەندەي سان-سالتاناتپەن قارسى الۋى تالاي ازاماتتاردىڭ نامىسىنا تيگەنى انىق.

وليگارحتاردىڭ شىلاۋىندا كەتكەن شەندىلەردى كورىپ، بۇلارمەن جاڭا قازاقستاندى قۇرۋ مۇمكىن ەمەس ەكەنىن بىردەن تۇسىنەسىڭ.

ءماجىلىس سايلاۋى وتكەننەن كەيىن جاڭا ۇكىمەت جاساقتالاتىنى انىق. سول كەزدە ۇكىمەتكە وليگارحتاردىڭ سويىلىن سوعاتىن، قۇداسىنداي قۇشاقتاسىپ جۇرەتىن اق جاعالىلاردى مۇلدە جولاتپاۋ كەرەك.

ولاردىڭ ورنىنا وليگارحتاردى تايراڭداتپايتىن، ولارمەن تەڭ دارەجەدەن سويلەسەتىن ازاماتتاردى بيلىككە اكەلۋ كەرەك. ايتپەسە وزگەرىس بولمايدى. وزگەرىستىڭ باسى وليگارحتارعا تالاپ قويىپ، ونى ورىنداتۋدان باستالدى.

نۇرلان جۇماحان