Oligarhtardan qaitarylǵan 945 mln teńge Balqash qalasynyń áýejaiyn jańǵyrtýǵa bólindi, dep habarlaidy Dalanews.kz.
Premer-ministrdiń baspasóz qyzmetiniń málimetinshe, memleket basshysynyń óńirlik kólik habtaryn damytý jáne áýe qatynasynyń qaýipsizdigin arttyrý jónindegi tapsyrmalaryn oryndaý aiasynda arnaiy memlekettik qordan Balqash áýejaiyn rekonstrýktsiialaýǵa 945 mln teńge bólindi.
«Jańǵyrtý jumystary jolaýshylarǵa kórsetiletin qyzmet sapasyn arttyrýǵa jáne áýejaidyń negizgi tehnikalyq sipattamalaryn halyqaralyq standarttarǵa sáikestendirýge múmkindik beredi. Áýejaidyń ótkizý qabileti 30%-dan asa ósedi», – delingen habarlamada.
Úkimettiń málimetinshe, qazirgi ýaqytta jumys kóleminiń aitarlyqtai bóligi oryndalǵan.
«Áýejaidyń negizgi ǵimaraty men qosalqy qurylystarynyń shatyry jańartyldy, terezeler ornatyldy, káriz júiesi men sý qubyrynyń negizgi jelisi tartyldy. Sonymen qatar kárizdik sorǵy stantsiiasy, blokty-komplekt transformatorlyq qosalqy stantsiia, jeldetý jáne jylytý júieleri ornatyldy. Qazirgi ýaqytta áýejaiǵa qajetti alǵashqy aerodromdyq arnaiy tehnikany satyp alý jumystary júrip jatyr», – dep málim etti vedomstvo.
Úkimettiń aqparatyna súiensek, qazirdiń ózinde ózdiginen júretin trap, aerodromǵa arnalǵan órt sóndirý kóligi jáne janarmai quiý mashinasy satyp alynǵan.
«Prezidenttiń Joldaýyn iske asyrý aiasynda Qazaqstanda aviatsiialyq infraqurylymdy damytý boiynsha keshendi jumys júrgizilýde. Oǵan Astana, Almaty, Shymkent jáne Aqtóbe áýejailaryn mýltimodaldy habtarǵa ainaldyrý úshin keń aýqymdy jańǵyrtý, sondai-aq negizgi týristik aimaqtarda (Katonqaraǵai, Zaisan, Kendirli) jańa áýejailar salý jáne óńirlik áýe aimaqtaryn qalpyna keltirý kiredi», – dedi Úkimet.
