Qaıtarylǵan aktıvter esebinen Petropavlda balabaqsha salý úshin 2 mlrd teńgeden astam qarjy bólindi, dep habarlaıdy Dalanews.kz.

Prezıdent tapsyrmasyn oryndaý aıasynda memleketke zańsyz jolmen alynǵan aktıvterdi qaıtarý esebinen áleýmettik mańyzy bar jobalardy júzege asyrý jalǵasýda. 

Úkimet Petropavlda 280 oryndyq balabaqsha salý úshin Arnaýly memlekettik qordan 2 mlrd teńgeden astam qarajat bólý týraly sheshim qabyldady. Nysan qazirgi tańda belsendi salynyp jatqan «Jas Órken» shaǵyn aýdanynda ornalasady. Qazir onda bala sany 100% toly mektepke deıingi 3 mekeme jumys isteıdi.

Balabaqsha qurylysy mektepke deıingi uıymdardaǵy oryn tapshylyǵyn azaıtyp, balalarǵa sapaly bilim berýdiń qoljetimdiligin arttyrýǵa múmkindik beredi. Qazirgi ýaqytta Petropavlda mektepke deıingi uıymdarǵa ornalasýǵa shamamen 3 myń bala kezekte tur, olardyń jartysy 2 jastan 6 jasqa deıingi balalar.

Buǵan deıin Úkimet Atyraý oblysyndaǵy Jamansor jáne Ulytaý óńirindegi Manadyr aýyldarynda mektepter, Astanada tirek-qımyl apparaty buzylǵan balalarǵa arnalǵan ońaltý ortalyǵy, Aqtóbe qalasynda erekshe balalarǵa arnalǵan arnaıy balabaqsha, Aqmola oblysynyń Zerendi aýylynda sport kesheni jáne Rıdder qalasynda kópsalaly aýrýhana kesheni qurylysyn aıaqtaýǵa arnalǵan jobalardy iske asyrý úshin qarajat bólý týraly sheshim qabyldaǵan bolatyn.