قايتارىلعان اكتيۆتەر ەسەبىنەن پەتروپاۆلدا بالاباقشا سالۋ ءۇشىن 2 ملرد تەڭگەدەن استام قارجى ءبولىندى، دەپ حابارلايدى Dalanews.kz.
پرەزيدەنت تاپسىرماسىن ورىنداۋ اياسىندا مەملەكەتكە زاڭسىز جولمەن الىنعان اكتيۆتەردى قايتارۋ ەسەبىنەن الەۋمەتتىك ماڭىزى بار جوبالاردى جۇزەگە اسىرۋ جالعاسۋدا.
ۇكىمەت پەتروپاۆلدا 280 ورىندىق بالاباقشا سالۋ ءۇشىن ارناۋلى مەملەكەتتىك قوردان 2 ملرد تەڭگەدەن استام قاراجات ءبولۋ تۋرالى شەشىم قابىلدادى. نىسان قازىرگى تاڭدا بەلسەندى سالىنىپ جاتقان «جاس وركەن» شاعىن اۋدانىندا ورنالاسادى. ءقازىر وندا بالا سانى 100% تولى مەكتەپكە دەيىنگى 3 مەكەمە جۇمىس ىستەيدى.
بالاباقشا قۇرىلىسى مەكتەپكە دەيىنگى ۇيىمدارداعى ورىن تاپشىلىعىن ازايتىپ، بالالارعا ساپالى ءبىلىم بەرۋدىڭ قولجەتىمدىلىگىن ارتتىرۋعا مۇمكىندىك بەرەدى. قازىرگى ۋاقىتتا پەتروپاۆلدا مەكتەپكە دەيىنگى ۇيىمدارعا ورنالاسۋعا شامامەن 3 مىڭ بالا كەزەكتە تۇر، ولاردىڭ جارتىسى 2 جاستان 6 جاسقا دەيىنگى بالالار.
بۇعان دەيىن ۇكىمەت اتىراۋ وبلىسىنداعى جامانسور جانە ۇلىتاۋ وڭىرىندەگى مانادىر اۋىلدارىندا مەكتەپتەر، استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعى، اقتوبە قالاسىندا ەرەكشە بالالارعا ارنالعان ارنايى بالاباقشا، اقمولا وبلىسىنىڭ زەرەندى اۋىلىندا سپورت كەشەنى جانە ريددەر قالاسىندا كوپسالالى اۋرۋحانا كەشەنى قۇرىلىسىن اياقتاۋعا ارنالعان جوبالاردى ىسكە اسىرۋ ءۇشىن قاراجات ءبولۋ تۋرالى شەشىم قابىلداعان بولاتىن.
