Olıgarh Tımýr Qulybaev munaıgaz bıznesi salasynan ketýi múmkin. Mundaı boljamdy Nege.kz saıty óz derekkózine silteme jasap, habarlaıdy, dep jazady Dalanews.kz.

Nege.kz saıtynyń málimetinshe, "Joint Resourced" holdıńi eki jyl qatarynan shyǵynǵa ushyraýda. 2024 jyly kompanıa 86 mıllıard teńge shyǵynǵa batsa, al  bıylǵy jyldyń jartysynda 3,5 mıllıard teńgege mınýsqa kirip otyr. 

"Joint Resourced" AQ – Tımýr Asqarulynyń shıkizattyq, munaı-gaz bıznesin biriktirgen basqarýshy kompanıa. Biraq ol byltyrdan beri óziniń baqylaýyndaǵy kompanıalardyń barlyǵyn senimdi basqarýǵa tapsyryp, olardyń operasıalyq tirligine aralasýdy qoıǵan. Tek olardyń taza paıdasynan dıvıdend alyp qana otyr.

"Qulybaev óziniń shıkizattyq, munaı-gaz óndirý bıznesinen ketýi ǵajap emes. Ol tek bank, qarjy salasyndaǵy aktıvin, dálirek aıtqanda, Halyk tobyndaǵy úlesi men jyljymaıtyn múlikti basqarý jáne rıteıldi saqtap qalýy múmkin. Sebebi qazir tek qarjy salasy ǵana olıgarhqa aıtarlyqtaı kiris ákelip otyr. Bizdiń oıymyzsha Qulybaev Halyk tobymen qatar Kıpros pen Mercury Properties basqarýshy kompanıalaryna ıelik etýin jalǵastyra beredi. Sońǵy eki kompanıa Viled premıým áshekeı fırmasyn, Qazaq Oil janar-jaǵarmaı beketteri jelisin, Bahýs araq-sharap zaýytyn jáne bıznes-ortalyqtardaǵy komersıalyq múlikterdi basqarady. Al olarǵa suranys tómendegen joq", delingen basylymda.

Munaı salasynyń mamany Nurlan Jumaǵulov óziniń Telegram arnasynda bul rette bylaı dep jazady:

"Qańtar oqıǵasynan keıin Qulybaevtyń komandasy munaıgaz aktıvterin  (Kaspıı neft, Almeks Plús, Krıstal Menejment) bir qolǵa 945 mln dollarǵa satýdy qarastyrǵany esimde. Biraq, sońynda olar bul oıynan aınyp qalǵan. Al ótken jyly iri munaıgaz aktıvi – Kaspıı neftke ekologıalyq buzýshylyqtar úshin 30 mln dollar aıyppul salyndy. Bul elimizde Ekologıalyq kodeks qoldanysqa engizilgeli bergi tólengen eń iri aıyppul boldy".

Buǵan deıin saıtymyzda Qulybaevtyń "Halyk" qory Jańaózende halyqaralyq deńgeıdegi sport keshenin salyp jatqanyn jazǵanbyz.