وليگارح تيمۋر قۇلىبايەۆ مۇنايگاز بيزنەسى سالاسىنان كەتۋى مۇمكىن. مۇنداي بولجامدى Nege.kz سايتى ءوز دەرەككوزىنە سىلتەمە جاساپ، حابارلايدى، دەپ جازادى Dalanews.kz.

Nege.kz سايتىنىڭ مالىمەتىنشە، "Joint Resourced" حولدينگى ەكى جىل قاتارىنان شىعىنعا ۇشىراۋدا. 2024 جىلى كومپانيا 86 ميلليارد تەڭگە شىعىنعا باتسا، ال  بيىلعى جىلدىڭ جارتىسىندا 3،5 ميلليارد تەڭگەگە مينۋسقا كىرىپ وتىر. 

"Joint Resourced" اق – تيمۋر اسقار ۇلىنىڭ شيكىزاتتىق، مۇناي-گاز بيزنەسىن بىرىكتىرگەن باسقارۋشى كومپانيا. ءبىراق ول بىلتىردان بەرى ءوزىنىڭ باقىلاۋىنداعى كومپانيالاردىڭ بارلىعىن سەنىمدى باسقارۋعا تاپسىرىپ، ولاردىڭ وپەراسيالىق تىرلىگىنە ارالاسۋدى قويعان. تەك ولاردىڭ تازا پايداسىنان ديۆيدەند الىپ قانا وتىر.

"قۇلىبايەۆ ءوزىنىڭ شيكىزاتتىق، مۇناي-گاز ءوندىرۋ بيزنەسىنەن كەتۋى عاجاپ ەمەس. ول تەك بانك، قارجى سالاسىنداعى اكتيۆىن، دالىرەك ايتقاندا، Halyk توبىنداعى ۇلەسى مەن جىلجىمايتىن مۇلىكتى باسقارۋ جانە ريتەيلدى ساقتاپ قالۋى مۇمكىن. سەبەبى ءقازىر تەك قارجى سالاسى عانا وليگارحقا ايتارلىقتاي كىرىس اكەلىپ وتىر. ءبىزدىڭ ويىمىزشا قۇلىبايەۆ Halyk توبىمەن قاتار كيپروس پەن Mercury Properties باسقارۋشى كومپانيالارىنا يەلىك ەتۋىن جالعاستىرا بەرەدى. سوڭعى ەكى كومپانيا Viled پرەميۋم اشەكەي فيرماسىن، Qazaq Oil جانار-جاعارماي بەكەتتەرى جەلىسىن، باحۋس اراق-شاراپ زاۋىتىن جانە بيزنەس-ورتالىقتارداعى كوممەرسيالىق مۇلىكتەردى باسقارادى. ال ولارعا سۇرانىس تومەندەگەن جوق"، دەلىنگەن باسىلىمدا.

مۇناي سالاسىنىڭ مامانى نۇرلان جۇماعۇلوۆ ءوزىنىڭ Telegram ارناسىندا بۇل رەتتە بىلاي دەپ جازادى:

"قاڭتار وقيعاسىنان كەيىن قۇلىبايەۆتىڭ كومانداسى مۇنايگاز اكتيۆتەرىن  (كاسپيي نەفت، المەكس پليۋس، كريستالل مەنەدجمەنت) ءبىر قولعا 945 ملن دوللارعا ساتۋدى قاراستىرعانى ەسىمدە. ءبىراق، سوڭىندا ولار بۇل ويىنان اينىپ قالعان. ال وتكەن جىلى ءىرى مۇنايگاز اكتيۆى – كاسپيي نەفتكە ەكولوگيالىق بۇزۋشىلىقتار ءۇشىن 30 ملن دوللار ايىپپۇل سالىندى. بۇل ەلىمىزدە ەكولوگيالىق كودەكس قولدانىسقا ەنگىزىلگەلى بەرگى تولەنگەن ەڭ ءىرى ايىپپۇل بولدى".

بۇعان دەيىن سايتىمىزدا قۇلىبايەۆتىڭ "Halyk" قورى جاڭاوزەندە حالىقارالىق دەڭگەيدەگى سپورت كەشەنىن سالىپ جاتقانىن جازعانبىز.