Oljas Qudaibergenov: «Halyq «Qazaqstanda jasalǵan» taýardy alǵysy keledi»
- Qazir indýstriialyq innovatsiialyq damý memlekettik baǵdarlamasynyń bolashaǵyna adamdardyń senimsizdikpen qaraitynyn túsinýge bolady. Sebebi, baǵdarlama buǵan deiin halyqtyń turmysyna aitarlyqtai ózgeris ákelgen joq. Adamdar, Qazaqstanda jasalǵan kiimdi kigisi keledi, aiaq kiimdi alǵysy keledi, turmystyq tehnikalardy paidalanǵysy keledi, otandyq úi jabdyqtaryna qyzyǵýshylyqpen qaraidy. Sol sebepti, aldaǵy besjyldyqta otandyq tutynýshylyq taýarlardy óndirýge kóbirek kóńil bólgen durys dep oilaimyn, - deidi Oljas Qudaibergenov.
Sondai-aq, Makroekonomikalyq zertteýler ortalyǵynyń direktory ekonomikadaǵy óńdeýshi salanyń úlesiniń qubylýyna qatysty óz oiymen bólisti.
Taǵy bir aita keterligi, ekonomikamyzdaǵy ónerkásiptiń úlesi 30 paiyzdy qurapty. Bul kórsetkish turaqty túrde saqtalyp kelgen bolatyn.
- 2009 jyly, 2015 jyly daǵdarysqa bailanysty bul kórsetkish tómendegeni ras. 1991 jyly ónerkásip salasyndaǵy óńdeý ónerkásibiniń úlesi 30 paiyzdyń 24 paiyzyn qurady, 4 paiyzy taý-ken óndirisine tiesili boldy. Sodan bergi aralyqta taý-ken óndirisi únemi ósip otyryp, óńdeý ónerkásibinen ozyp ketti. 2012 jyly kerisinshe, taý-ken ónerkásibiniń úlesi 18 paiyzǵa deiin jetse, óńdeý ónerkásibiniń úlesi 10 paiyzǵa deiin quldyrap ketken, - deidi Oljas Qudaibergenov.
Osy otyrysta aitylǵandai, 2015 jyldyń qorytyndysy boiynsha, Údemeli indýstriialyq innovatsiialyq damý memlekettik baǵdarlamasynyń aiasynda júzege asyrylǵan 898 jobanyń 21-i qazir toqtap tur. 21 joba barlyq júzege asyrylǵan jobalardyń 2 paiyzyn quraidy. Toqtap qalǵan jobalar aimaqtyq joba retinde jergilikti ákimdikterdiń qadaǵalaýyna alynǵan. «Qazaqstandyq indýstriiany damytý institýty» AQ Basqarma tóraǵasy Aidyn Kúlseiitov atap ótkendei, olardy qaita jandandyrý úshin jumystar jasalýda.
