Qazaqstan Premer-ministri Oljas Bektenov Almaty qalasyndaǵy Eýraziialyq úkimetaralyq keńes otyrysy aiasynda Iran Islam Respýblikasynyń birinshi vitse-prezidenti Mohammad-Reza Arefpen kezdesti. Saýda-ekonomikalyq qarym-qatynastardy tereńdetý, aýyl sharýashylyǵy, kólik jáne logistika salasyndaǵy yntymaqtastyqty, sondai-aq investitsiialyq ózara is-qimyl máseleleri qaraldy, dep habarlaidy Dalanews.kz.
Kelissózder barysynda taraptar Iran Islam Respýblikasynyń ótken jylǵy jeltoqsan aiynda Eýraziialyq ekonomikalyq odaqta baiqaýshy mártebesin alýy ekijaqty qatynastardyń barlyq baǵyty boiynsha damýyna yqpal etetinin atap ótti. Iran – Qazaqstannyń Kaspii aimaǵyndaǵy tatý kórshisi. Ótken jyldyń 11 aiynda eki el arasyndaǵy taýar ainalymy 8,1%-ǵa artyp, shamamen $300 mln-ǵa jetti. Qazaqstan tarapy jalpy quny $132 mln-nan asatyn 60 taýar túrin ártaraptandyrýǵa, eksport kólemin ulǵaitýǵa jáne aýqymyn keńeitýge qyzyǵýshylyq tanytty. Atap aitqanda, biyl elimizde 26 mln tonnadan astam astyq jinaldy. Otandyq eksporttaýshylar bidai, arpa jáne maily daqyldardy qosa alǵanda, astyq ónimderine degen Iran naryǵy suranysyn qanaǵattandyrýǵa daiyn. Jalpy, ótken jyldyń 11 aiynda Qazaqstan men Iran arasyndaǵy agroónerkásip taýarynyń ainalymy 25%-ǵa artyp, $186 mln-ǵa jetti.
“Soltústik – Ońtústik” halyqaralyq dálizi sheńberinde júk tasymaldaý kólemin arttyrý, tranzittik múmkindikterdi keńeitý jáne infraqurylymdy damytý maqsatynda kólik-logistika salasyndaǵy yntymaqtastyq máseleleri talqylandy. Qazaqstan (Aqtaý, Quryq) jáne Iran (Anzali, Amirabad) porttary terminaldaryn jańǵyrtýdyń keleshegi máseleleri qaraldy.
“Bizdiń basty maqsatymyz – eki memleket basshylary aiqyndaǵan mindetterdi tolyǵymen júzege asyrý jáne Qazaqstan-Iran yntymaqtastyǵyn sapaly jańa deńgeige kóterý. Bizdiń saýda-ekonomikalyq áriptestigimizdiń áleýeti joǵary, ony odan ári damytý úshin múmkindikterimiz jetkilikti. Ózara qurmet pen dostyq aiasynda ótip jatqan búgingi kelissózder eki el arasyndaǵy kópjaqty yntymaqtastyqty nyǵaitýǵa múmkindik beredi dep senemin”, — dep atap ótti Oljas Bektenov.
“Memleketterimiz geografiialyq jáne aýmaqtyq jaǵynan bailanysyp jatyr. Elderimizdiń kóshbasshylary arasynda syndarly saiasi dialog ornatyldy. Eki memleket basshylary úkimetter aldyna ekijaqty saýda kólemin $3 mlrd-qa deiin arttyrý mindetin qoidy. Biz óz tarapymyzdan ekijaqty yntymaqtastyqty keńeitý máselelerin jan-jaqty talqylaýǵa daiynbyz”, — dedi Mohammad-Reza Aref.
