قازاقستان پرەمەر-مينيسترى ولجاس بەكتەنوۆ الماتى قالاسىنداعى ەۋرازيالىق ۇكىمەتارالىق كەڭەس وتىرىسى اياسىندا يران يسلام رەسپۋبليكاسىنىڭ ءبىرىنشى ۆيسە-پرەزيدەنتى موحامماد-رەزا ارەفپەن كەزدەستى. ساۋدا-ەكونوميكالىق قارىم-قاتىناستاردى تەرەڭدەتۋ، اۋىل شارۋاشىلىعى، كولىك جانە لوگيستيكا سالاسىنداعى ىنتىماقتاستىقتى، سونداي-اق ينۆەستيسيالىق ءوزارا ءىس-قيمىل ماسەلەلەرى قارالدى، دەپ حابارلايدى Dalanews.kz.
كەلىسسوزدەر بارىسىندا تاراپتار يران يسلام رەسپۋبليكاسىنىڭ وتكەن جىلعى جەلتوقسان ايىندا ەۋرازيالىق ەكونوميكالىق وداقتا بايقاۋشى مارتەبەسىن الۋى ەكىجاقتى قاتىناستاردىڭ بارلىق باعىتى بويىنشا دامۋىنا ىقپال ەتەتىنىن اتاپ ءوتتى. يران – قازاقستاننىڭ كاسپيي ايماعىنداعى تاتۋ كورشىسى. وتكەن جىلدىڭ 11 ايىندا ەكى ەل اراسىنداعى تاۋار اينالىمى 8،1%-عا ارتىپ، شامامەن $300 ملن-عا جەتتى. قازاقستان تاراپى جالپى قۇنى $132 ملن-نان اساتىن 60 تاۋار ءتۇرىن ءارتاراپتاندىرۋعا، ەكسپورت كولەمىن ۇلعايتۋعا جانە اۋقىمىن كەڭەيتۋگە قىزىعۋشىلىق تانىتتى. اتاپ ايتقاندا، بيىل ەلىمىزدە 26 ملن توننادان استام استىق جينالدى. وتاندىق ەكسپورتتاۋشىلار بيداي، ارپا جانە مايلى داقىلداردى قوسا العاندا، استىق ونىمدەرىنە دەگەن يران نارىعى سۇرانىسىن قاناعاتتاندىرۋعا دايىن. جالپى، وتكەن جىلدىڭ 11 ايىندا قازاقستان مەن يران اراسىنداعى اگروونەركاسىپ تاۋارىنىڭ اينالىمى 25%-عا ارتىپ، $186 ملن-عا جەتتى.
“سولتۇستىك – وڭتۇستىك” حالىقارالىق ءدالىزى شەڭبەرىندە جۇك تاسىمالداۋ كولەمىن ارتتىرۋ، ترانزيتتىك مۇمكىندىكتەردى كەڭەيتۋ جانە ينفراقۇرىلىمدى دامىتۋ ماقساتىندا كولىك-لوگيستيكا سالاسىنداعى ىنتىماقتاستىق ماسەلەلەرى تالقىلاندى. قازاقستان (اقتاۋ، قۇرىق) جانە يران (انزالي، اميراباد) پورتتارى تەرمينالدارىن جاڭعىرتۋدىڭ كەلەشەگى ماسەلەلەرى قارالدى.
“ءبىزدىڭ باستى ماقساتىمىز – ەكى مەملەكەت باسشىلارى ايقىنداعان مىندەتتەردى تولىعىمەن جۇزەگە اسىرۋ جانە قازاقستان-يران ىنتىماقتاستىعىن ساپالى جاڭا دەڭگەيگە كوتەرۋ. ءبىزدىڭ ساۋدا-ەكونوميكالىق ارىپتەستىگىمىزدىڭ الەۋەتى جوعارى، ونى ودان ءارى دامىتۋ ءۇشىن مۇمكىندىكتەرىمىز جەتكىلىكتى. ءوزارا قۇرمەت پەن دوستىق اياسىندا ءوتىپ جاتقان بۇگىنگى كەلىسسوزدەر ەكى ەل اراسىنداعى كوپجاقتى ىنتىماقتاستىقتى نىعايتۋعا مۇمكىندىك بەرەدى دەپ سەنەمىن”، — دەپ اتاپ ءوتتى ولجاس بەكتەنوۆ.
“مەملەكەتتەرىمىز گەوگرافيالىق جانە اۋماقتىق جاعىنان بايلانىسىپ جاتىر. ەلدەرىمىزدىڭ كوشباسشىلارى اراسىندا سىندارلى ساياسي ديالوگ ورناتىلدى. ەكى مەملەكەت باسشىلارى ۇكىمەتتەر الدىنا ەكىجاقتى ساۋدا كولەمىن $3 ملرد-قا دەيىن ارتتىرۋ مىندەتىن قويدى. ءبىز ءوز تاراپىمىزدان ەكىجاقتى ىنتىماقتاستىقتى كەڭەيتۋ ماسەلەلەرىن جان-جاقتى تالقىلاۋعا دايىنبىز”، — دەدى موحامماد-رەزا ارەف.
