Parlament palatalarynyń birlesken otyrysynda depýtattardyń suraqtaryna jaýap bere otyryp, QR Premer-Ministri Oljas Bektenov ekonomikanyń 6% deńgeiinde ósýine qol jetkizý jónindegi sharalar týraly aitty.
Onyń aitýynsha, qazirgi kúrdeli geosaiasi jaǵdaiǵa jáne negizgi saýda seriktesteriniń aǵymdaǵy jaǵdaiyna qaramastan, Úkimet Memleket basshysynyń ekonomikanyń ósýin qamtamasyz etý jónindegi alǵa qoiǵan mindetine qol jetkizý úshin bar kúsh-jigerin salady. Búgingi tańda 8% deńgeiinde ósýdiń oń kórsetkishteri qurylys, kólik jáne bailanys salalarynan kórindi. Jappai sý tasqynyna bailanysty saýdada belgili bir tómendeý baiqaldy. Degenmen, búgingi tańda bul saladaǵy ósý dinamikasy belsendi túrde qalpyna keltirilýde. Jalpy, Úkimet ekonomikanyń ósýiniń negizgi núkteleri retinde qurylys, infraqurylym, óńdeý jáne AÓK bóledi. Bul salalarǵa basym qoldaý kórsetiletin bolady.
Úkimet «Samuryq-Qazyna» jáne «Báiterek» holdingteriniń, ishki kapital naryǵynyń resýrstary men qarajatyn, ekonomikadaǵy basym jobalardy qarjylandyrý úshin tikelei sheteldik investitsiialar men jeke kapitaldy belsendi tartady. «Báiterek» jelisi boiynsha biyl jobalardy 3 trln teńgeden astam somaǵa, «Samuryq-Qazyna» qarajaty esebinen – 700 mlrd teńgeden astam somaǵa qarjylandyrý josparlanyp otyr.
Naqty sharalar:
– qurylys salasynda keminde 18 mln sharshy metr turǵyn úi salý josparlanýda;
– «Otbasy Banki» - «Otaý» jáne «Naýryz» jańa jeńildetilgen ipotekalyq baǵdarlamalaryn iske qosty. Ol boiynsha 64 myń adamnan ótinish qabyldandy;
– jalǵa beriletin turǵyn úi qurylysyna qosymsha 222 mlrd teńge bólindi;
–12 myń shaqyrymnan astam avtojoldardy salý, rekonstrýktsiialaý jáne jóndeý josparlanǵan – bul rekordtyq sandar;
– 13 arnaiy ekonomikalyq jáne indýstriialyq aimaqtardyń, sondai-aq shaǵyn ónerkásiptik aimaqtardyń aýmaqtary qajetti infraqurylymmen qamtamasyz etiletin bolady;
– jańa gaz jelilerin salý esebinen qosymsha 87 eldi mekendi gazdandyrý josparlanýda;
– gaz óńdeý kásiporyndarynyń qurylysy júrgizilýde; – otandyq taýar óndirýshilerdi qoldaý úshin ulttyq rejimnen alyp tastaý tizbesi 4 ese keńeitildi. Eger jyl basynda tizbede shamamen 1 myń taýar bolsa, qazir onda 4 myńnan astam taýar túri bar.
«Bul biz qazir júzege asyryp jatqan negizgi aýqymdy sharalar. Olar ekonomikanyń ósýin qamtamasyz etedi», — dep atap ótti Oljas Bektenov.
