Qazaqstan Premer-Ministri, Sý tasqynyna qarsy is-sharalardy úilestirý jáne sý tasqynynyń saldaryn joiý jónindegi respýblikalyq shtabtyń jetekshisi Oljas Bektenov Soltústik Qazaqstan oblysynda Esil ózeniniń jaiylmasyn tikushaqpen ainalyp ótip, Sergeev sý qoimasyndaǵy jaǵdaidy tekserdi. Sondai-aq Esil ózeni arnasynan asqan jaǵdaida sý basýdyń aldyn alý jáne zalaldy azaitý úshin Petropavl qalasynyń mańyndaǵy bógetterdi nyǵaitý boiynsha jumystar tekseriletin bolady.
Úkimet basshysyna Sergeev sý toraby qazirgi ýaqytta qýatynyń sheginde jumys istep jatqany týraly baiandaldy.
8 sáýirdegi jaǵdai boiynsha 6017 m3/s deńgeiinde sý kelýi tirkeldi, ony jiberý 4720 m3/s deńgeiinde júzege asyrylyp jatyr.
Sondai-aq Sergeev sý qoimasy paidalanýǵa berilgen 1969 jyldan bastap sýdyń maksimaldy shyǵyny 3600 m3/s deńgeiinde bolǵan.
Osylaisha, qazirgi sý qoimasynyń tolýy sońǵy 50 jylda alǵash ret oryn alyp otyr jáne aldyńǵy maksimaldy kórsetkishterden 2 ese derlik asady.
Osyǵan bailanysty sý tasqynyna qarsy is-sharalardy tolyqqandy júrgizý ári ǵimarattardyń qiraýyna jol bermeý úshin Oljas Bektenovtiń tapsyrmasymen QR Qarýly kúshteri qurlyq áskerleri brigadalarynyń 300 áskeri qyzmetkeri Astana qalasynan Soltústik Qazaqstan oblysyna attandy.
QR Ulttyq ulan akademiiasynan 400 kýrsant jáne QR Ulttyq ulanynyń «Ortalyq» óńirlik qolbasshylyǵy áskeri bóliminiń 300-den astam qyzmetkeri tartyldy.
Bul rette óńirge kómek kórsetý úshin tartylatyn áskeriler sanyn odan ári ulǵaitý jóninde komanda berildi. Aita ketý kerek, qazirgi ýaqytta qorǵanys ministri Rýslan Jaqsylyqov – Qostanai oblysynda.
«Prezident sý tasqynymen kúreske barlyq kúshti jumyldyrý mindetin qoidy. Biz Soltústik Qazaqstan oblysynyń ózine Qorǵanys ministrligi men Ulttyq ulannyń myńǵa jýyq qyzmetkerin jumyldyrdyq. Mindetimiz – Esil ózeni arnasynan asyp ketken kezde úlken zardaptardyń aldyn alý. Mundai aýqymdaǵy sý kólemi Sergeev sý qoimasynyń búkil tarihynda alǵash ret oryn alýda», — dedi Oljas Bektenov.
Buǵan deiin Úkimet basshysy Oljas Bektenovtiń tapsyrmasy boiynsha birinshi vitse-premer Roman Skliar SQO-nyń qurylys jáne jol-qurylys kompaniialarynyń basshylaryn sý tasqynyna qarsy is-sharalardy ótkizýge kómek kórsetýge shaqyrdy.
