Álibek Qalbaıdyń ólimine 18 jastaǵy jaýynger Aıbolat Amanjolov kúdikti dep tanylǵan. İsti sýdıa Qanat Estaı júrgizdi.
Aıyptaý aktisin oqyǵan prokýror Qulanbaev Álibek Qalbaı qazasynan bir kún buryn Aıbolat Amanjolovpen "tóbelesip, aýyr jaralanǵanyn" aıtty.
– 2022 jyldyń 21 sáýirinde qatardaǵy jaýynger Aıbolat Amanjolov dálizde óziniń ústemdigin kórsetý maqsatynda belgisiz sebeptermen qyzmettesi, qatardaǵy jaýynger Álibek Qalbaıdyń sol qoltyǵynan qolyn ótkizip, alaqanymen basyn ustap, ishinen birneshe ret urǵan. Álibek Qalbaı qorǵaný maqsatynda bosap shyqqan sátte Amanjolov ishinen, keýdesinen jáne oń jaq buǵana tusynan birneshe ret urǵan, – dedi prokýror.
Kúdikti Aıbolat Amanjolov ózine taǵylǵan aıypty moıyndamady. Onyń advokaty Serjan Pirálıev tergeý ashyq ótpegenin, Amanjolovty kúdikti dep tanýǵa dálel jetkiliksiz ekenin aıtty.
– Nıkolaı Kýrochkın degen bas kýá birinshi ret suraǵanda "eshteńe kórmedim" dep jaýap bergen. Keıin keshke qaraı ekinshi ret suraǵanda "kórdim, ekeýi tóbelesti, jeti ret urdy" depti, – deıdi advokat Serjan Pirálıev.
Jábirlenýshi tarap Álibek Qalbaıdyń týystary da prokýratýranyń bir ǵana adamdy aıyptaǵanyna narazylyq bildirdi. Olardyń advokaty Gúlaıym Shyntaevanyń sózinshe, kýáger Kýrochkınnen jaýap alýǵa eki tarap ókilderi qatyspaǵan.
– Bir sarbazdy ǵana kináli etip, sony ǵana jazalaýdyń amaly jasalyp jatyr. Bul iske áskerı bólimge jaýapty serjanttar men ofıserlerdiń de tikeleı qatysy bar. Tergeý sotynda aıyptylar anyqtalady dep úmittenemiz,– dedi ol.
Tergeý sotyna 176 kýáger shaqyrylmaq. Jaýyngerdiń ólimi boıynsha áskerı bólim basshylarynyń ústinen de Qylmystyq kodeksktiń 453-baby boıynsha ("Qyzmetke salǵyrt qaraý") is qozǵalǵan. Biraq tergeý amaldary qupıa júrip jatqandyqtan kúdiktiler bar-joǵy belgisiz.
18 jastaǵy Álibek Qalbaı 18 sáýirde áskerı boryshyn óteý úshin Aqtaý qalasynan Jambyl oblysynyń Qordaı aýdany Otar aýylyndaǵy №30212 áskerı bólimshesine kelip, 22 sáýirde jumbaq jaǵdaıda qaıtys bolǵan. Tańǵy sapta turǵanda densaýlyǵy nasharlap, gospıtálda kóz jumǵan.
Týystary Álibektiń denesinde kógergen jerler baryn, qabyrǵasy maıysqanyn baıqaǵan.
Jyldyń basynan beri Qorǵanys mınıstrligi men İshki ister mınıstrliginiń ondaǵan jaýyngeri qaza boldy. Muny kóbine áskerdegi álimjettikpen baılanystyrady.
22 tamyzda Qazaqstan qorǵanys mınıstrligi "áskerge shaqyrýǵa deıingi kezeńde áskerı qyzmekterlerdi osyndaı áreketke ıtermeleıtin ártúrli ómirlik jaǵdaılar kezdesetinin eskerý kerek" dep málimdegen.
