الىبەك قالبايدىڭ ولىمىنە 18 جاستاعى جاۋىنگەر ايبولات امانجولوۆ كۇدىكتى دەپ تانىلعان. ءىستى سۋديا قانات ەستاي جۇرگىزدى.
ايىپتاۋ اكتىسىن وقىعان پروكۋرور قۇلانبايەۆ الىبەك قالباي قازاسىنان ءبىر كۇن بۇرىن ايبولات امانجولوۆپەن "توبەلەسىپ، اۋىر جارالانعانىن" ايتتى.
– 2022 جىلدىڭ 21 ساۋىرىندە قاتارداعى جاۋىنگەر ايبولات امانجولوۆ دالىزدە ءوزىنىڭ ۇستەمدىگىن كورسەتۋ ماقساتىندا بەلگىسىز سەبەپتەرمەن قىزمەتتەسى، قاتارداعى جاۋىنگەر الىبەك قالبايدىڭ سول قولتىعىنان قولىن وتكىزىپ، الاقانىمەن باسىن ۇستاپ، ىشىنەن بىرنەشە رەت ۇرعان. الىبەك قالباي قورعانۋ ماقساتىندا بوساپ شىققان ساتتە امانجولوۆ ىشىنەن، كەۋدەسىنەن جانە وڭ جاق بۇعانا تۇسىنان بىرنەشە رەت ۇرعان، – دەدى پروكۋرور.
كۇدىكتى ايبولات امانجولوۆ وزىنە تاعىلعان ايىپتى مويىندامادى. ونىڭ ادۆوكاتى سەرجان پىرالييەۆ تەرگەۋ اشىق وتپەگەنىن، امانجولوۆتى كۇدىكتى دەپ تانۋعا دالەل جەتكىلىكسىز ەكەنىن ايتتى.
– نيكولاي كۋروچكين دەگەن باس كۋا ءبىرىنشى رەت سۇراعاندا "ەشتەڭە كورمەدىم" دەپ جاۋاپ بەرگەن. كەيىن كەشكە قاراي ەكىنشى رەت سۇراعاندا "كوردىم، ەكەۋى توبەلەستى، جەتى رەت ۇردى" دەپتى، – دەيدى ادۆوكات سەرجان پىرالييەۆ.
جابىرلەنۋشى تاراپ الىبەك قالبايدىڭ تۋىستارى دا پروكۋراتۋرانىڭ ءبىر عانا ادامدى ايىپتاعانىنا نارازىلىق ءبىلدىردى. ولاردىڭ ادۆوكاتى گۇلايىم شىنتايەۆانىڭ سوزىنشە، كۋاگەر كۋروچكيننەن جاۋاپ الۋعا ەكى تاراپ وكىلدەرى قاتىسپاعان.
– ءبىر ساربازدى عانا كىنالى ەتىپ، سونى عانا جازالاۋدىڭ امالى جاسالىپ جاتىر. بۇل ىسكە اسكەري بولىمگە جاۋاپتى سەرجانتتار مەن وفيسەرلەردىڭ دە تىكەلەي قاتىسى بار. تەرگەۋ سوتىندا ايىپتىلار انىقتالادى دەپ ۇمىتتەنەمىز،– دەدى ول.
تەرگەۋ سوتىنا 176 كۋاگەر شاقىرىلماق. جاۋىنگەردىڭ ءولىمى بويىنشا اسكەري ءبولىم باسشىلارىنىڭ ۇستىنەن دە قىلمىستىق كودەكسكتىڭ 453-بابى بويىنشا ("قىزمەتكە سالعىرت قاراۋ") ءىس قوزعالعان. ءبىراق تەرگەۋ امالدارى قۇپيا ءجۇرىپ جاتقاندىقتان كۇدىكتىلەر بار-جوعى بەلگىسىز.
18 جاستاعى الىبەك قالباي 18 ساۋىردە اسكەري بورىشىن وتەۋ ءۇشىن اقتاۋ قالاسىنان جامبىل وبلىسىنىڭ قورداي اۋدانى وتار اۋىلىنداعى №30212 اسكەري بولىمشەسىنە كەلىپ، 22 ساۋىردە جۇمباق جاعدايدا قايتىس بولعان. تاڭعى ساپتا تۇرعاندا دەنساۋلىعى ناشارلاپ، گوسپيتالدا كوز جۇمعان.
تۋىستارى الىبەكتىڭ دەنەسىندە كوگەرگەن جەرلەر بارىن، قابىرعاسى مايىسقانىن بايقاعان.
جىلدىڭ باسىنان بەرى قورعانىس مينيسترلىگى مەن ىشكى ىستەر مينيسترلىگىنىڭ ونداعان جاۋىنگەرى قازا بولدى. مۇنى كوبىنە اسكەردەگى الىمجەتتىكپەن بايلانىستىرادى.
22 تامىزدا قازاقستان قورعانىس مينيسترلىگى "اسكەرگە شاقىرۋعا دەيىنگى كەزەڭدە اسكەري قىزمەكتەرلەردى وسىنداي ارەكەتكە يتەرمەلەيتىن ءارتۇرلى ومىرلىك جاعدايلار كەزدەسەتىنىن ەسكەرۋ كەرەك" دەپ مالىمدەگەن.
