«Astana» basketbol klýbynyń qyzmetin toqtatýy múmkin degen aqparatqa qatysty Týrizm jáne sport ministrligi Sport jáne dene shynyqtyrý isteri komiteti túsinikteme berdi, dep habarlaidy dalanews.kz.
Buǵan deiin klýb oiynshylary men Qazaqstan ulttyq quramasynyń músheleri Memleket basshysy Qasym-Jomart Toqaev pen Týrizm jáne sport ministri Erbol Myrzabosynovqa úndeý joldap, kásibi mansaptaryn jalǵastyrý múmkindigin saqtap qalýdy suraǵan bolatyn.
Oiynshylardyń aitýynsha, klýbtyń negizgi quramynyń taraýy qazaqstandyq basketboldyń damýyna keri áser etip, jas sportshylardyń ósýine, ulttyq chempionattyń deńgeiine jáne ulttyq quramaǵa oiynshy daiarlaý júiesine nuqsan keltirýi múmkin.
Alaida QR Týrizm jáne sport ministrliginiń Sport jáne dene shynyqtyrý isteri komiteti klýbtyń sońǵy jyldardaǵy nátijeleri kútken deńgeige sáikes kelmegenin málimdedi.
Halyqaralyq arenadaǵy nátije kóńil kónshitpedi
Vedomstvonyń málimetinshe, «Astana» ótken maýsymda VTB Biryńǵai ligasynda 44 matchtyń tek ekeýinde ǵana jeńiske jetip, 12 komandanyń ishinde sońǵy oryn alǵan. Jeńilis kórsetkishi 95 paiyzdan asqan.
Sonymen qatar klýb sońǵy segiz jyl boiy atalǵan týrnirdiń plei-off kezeńine shyǵa almaǵan.
El ishindegi jarystarda da maqsat oryndalmady
Ministrlik málimetine sáikes, «Astana» Qazaqstan Kýbogyn jeńe almady jáne Ulttyq liga chempiony ataǵyn da ielenbedi.
Vedomstvo muny klýb jumysynyń tiimdiligine qatysty suraqtardyń týyndaýyna sebep bolǵan negizgi faktorlardyń biri retinde atady.
Basymdyq jastar sportyna beriledi
Týrizm jáne sport ministrligi ótken jyly sport salasyn qarjylandyrýdyń tiimdiligin arttyrýǵa baǵyttalǵan zań qabyldanǵanyn eske saldy.
Zań ulttyq quramalardy damytýǵa, sport rezervin qalyptastyrýǵa jáne biýdjet qarajaty esebinen legionerlerdi qarjylandyrýdy shekteýge baǵyttalǵan.
Qazirgi ýaqytta elimizde basketboldy damytý tásilderin qaita qaraý jumystary júrgizilip jatyr. Negizgi nazar jastar komandalaryn damytýǵa, sapaly sport rezervin qalyptastyrýǵa jáne balalar men jasóspirimder sportyn qoldaýǵa aýdarylmaq.
