QR Syrtqy ister ministriniń orynbasary Álibek Qýantyrov Nigeriia Federativti Respýblikasynyń Syrtqy ister ministrligi, Ónerkásip, saýda jáne investitsiialar ministrligi, Munai ministrligi jáne basqa da vedomstvolardyń basshylyǵymen kezdesýler ótkizdi. Nigeriianyń Munai ministri Haineken Lokpobirimen kezdesý barysynda munai barlaý, óndirý, tasymaldaý jáne óńdeý salasyndaǵy yntymaqtastyq talqylandy, dep habarlaidy Dalanews.kz.
"Qazaqstan men Nigeriia qazaqstandyq munaidy Nigeriianyń munai óńdeý zaýyttarynda óńdeý múmkindigin zertteýge qyzyǵýshylyq bildirdi. Óz tarapynan Nigeriianyń munai resýrstary ministri yntymaqtastyqqa joǵary qyzyǵýshylyq tanytyp, álemdegi eń iri munai óndirýshilerdiń biri mártebesine qaramastan Nigeriia ishki qajettilikterdi qanaǵattandyrý jáne munai ónimderiniń eksportyn ulǵaitý úshin shikizattyń qosymsha kólemine muqtaj bolyp otyrǵanyn atap ótti", delingen QR SIM baspasóz habarlamasynda.
Nigeriia Syrtqy ister ministrliginiń Turaqty hatshysy Dýnoma Ýmar Ahmedpen ótken kezdesýde halyqaralyq alańdardaǵy yntymaqtastyqty nyǵaitý, BUU, Islam yntymaqtastyǵy uiymy jáne basqa da kópjaqty formattar aiasynda dialogty jandandyrý máseleleri qaraldy. Sonymen qatar taraptar ekonomikalyq yntymaqtastyq máselelerin talqylap, eki eldiń biznes-qoǵamdastyqtary arasynda tikelei ózara is-qimyldy kúsheitýdiń mańyzdylyǵyn atap ótti.
Qazaqstan SIM basshysynyń orynbasary Nigeriiamen bailanystardy damytýdyń mańyzdylyǵyn atap ótip, 2025 jylǵy qańtarda Abý-Dabide eki el prezidentteriniń kezdesýi yntymaqtastyqtyń joǵary qarqynyn belgilep, seriktestiktiń perspektivalyq baǵyttaryn aiqyndaǵanyn atap ótti.
"Saýda bailanystaryn nyǵaitý úshin Qazaqstan men Nigeriianyń biznes salalary arasynda bailanys ornatýdy, ózara saýda missiialaryn uiymdastyrýdy jáne ekijaqty saýdaǵa qatysty máselelerdi birlesip sheshýdi usynamyz. Bul bailanystardyń damýy jańa iskerlik seriktestik múmkindikterin ashady jáne eki el arasyndaǵy ekonomikalyq ózara is-qimyldy kúsheitedi", – dedi Qýantyrov.
Sapar aiasynda Nigeriianyń Gaz ministri Ekperikpe Ekpomen de kezdesý ótti. Kelissózder barysynda tabiǵi gaz jetkizý, gaz óńdeý tehnologiialary jáne qazaqstandyq kompaniialardyń Nigeriianyń gaz infraqurylymyn damytýǵa qatysý múmkindikteri talqylandy. Nigeriia tarapy ekologiialyq taza tehnologiialarǵa kóshý, kómirtegi shyǵaryndylaryn azaitý jáne turaqty ekonomikalyq damýdy qamtamasyz etýge múddeli ekenin atap ótti.
Nigeriianyń Ónerkásip, saýda jáne investitsiialar ministrliginiń Turaqty hatshysy Nýra Abba Rimimen ótken kezdesýde taý-ken salasyndaǵy investitsiialyq múmkindikter, atap aitqanda, paidaly qazbalardy barlaý jáne óńdeý salasyndaǵy yntymaqtastyq qarastyryldy. Qazaqstan tarapy shikizatty óńdeýdiń innovatsiialyq tehnologiialaryn birlesip qoldanýǵa jáne óndiristik qýattardy birlesip qurýǵa qyzyǵýshylyq bildirdi.
Qazaqstan Nigeriiaǵa eksportqa 300-den astam taýar ataýyn usyndy, sondai-aq Nigeriiadan kakao-burshaqtaryn tikelei importtaý máselesin qarastyrdy. Eki el arasyndaǵy taýar tasymalyna arnalǵan yqtimal úsh saýda dálizi qarastyrylyp, QR Kólik ministrligimen birlesip jumys júrgizilýde.
Qazaqstandyq delegatsiia Nigeriianyń "NEXIM Nigeria" banki basshylyǵymen kezdesti. Bank eldegi eń iri eksporttyq jáne importtyq operatsiialardy qarjylandyrady. Kelissózder nátijesinde "NEXIM Nigeria" men Qazaqstannyń Eksporttyq-nesielik agenttigi arasynda ózara túsinistik týraly memorandýmǵa qol qoiý týraly ýaǵdalastyqqa qol jetkizildi.
Buǵan deiin Memleket basshysy Qasym-Jomart Resei Úkimeti tóraǵasynyń orynbasary Aleksandr Novakty qabyldaǵany habarlanǵan.
