ق ر سىرتقى ىستەر ءمينيسترىنىڭ ورىنباسارى الىبەك قۋانتىروۆ نيگەريا فەدەراتيۆتى رەسپۋبليكاسىنىڭ سىرتقى ىستەر مينيسترلىگى، ونەركاسىپ، ساۋدا جانە ينۆەستيسيالار مينيسترلىگى، مۇناي مينيسترلىگى جانە باسقا دا ۆەدومستۆولاردىڭ باسشىلىعىمەن كەزدەسۋلەر وتكىزدى. نيگەريانىڭ مۇناي ءمينيسترى حاينەكەن لوكپوبيريمەن كەزدەسۋ بارىسىندا مۇناي بارلاۋ، ءوندىرۋ، تاسىمالداۋ جانە وڭدەۋ سالاسىنداعى ىنتىماقتاستىق تالقىلاندى، دەپ حابارلايدى Dalanews.kz.
"قازاقستان مەن نيگەريا قازاقستاندىق مۇنايدى نيگەريانىڭ مۇناي وڭدەۋ زاۋىتتارىندا وڭدەۋ مۇمكىندىگىن زەرتتەۋگە قىزىعۋشىلىق ءبىلدىردى. ءوز تاراپىنان نيگەريانىڭ مۇناي رەسۋرستارى ءمينيسترى ىنتىماقتاستىققا جوعارى قىزىعۋشىلىق تانىتىپ، الەمدەگى ەڭ ءىرى مۇناي وندىرۋشىلەردىڭ ءبىرى مارتەبەسىنە قاراماستان نيگەريا ىشكى قاجەتتىلىكتەردى قاناعاتتاندىرۋ جانە مۇناي ونىمدەرىنىڭ ەكسپورتىن ۇلعايتۋ ءۇشىن شيكىزاتتىڭ قوسىمشا كولەمىنە مۇقتاج بولىپ وتىرعانىن اتاپ ءوتتى"، دەلىنگەن ق ر ءسىم باسپا ءسوز حابارلاماسىندا.
نيگەريا سىرتقى ىستەر مينيسترلىگىنىڭ تۇراقتى حاتشىسى دۋنوما ۋمار احمەدپەن وتكەن كەزدەسۋدە حالىقارالىق الاڭدارداعى ىنتىماقتاستىقتى نىعايتۋ، بۇۇ، يسلام ىنتىماقتاستىعى ۇيىمى جانە باسقا دا كوپجاقتى فورماتتار اياسىندا ديالوگتى جانداندىرۋ ماسەلەلەرى قارالدى. سونىمەن قاتار تاراپتار ەكونوميكالىق ىنتىماقتاستىق ماسەلەلەرىن تالقىلاپ، ەكى ەلدىڭ بيزنەس-قوعامداستىقتارى اراسىندا تىكەلەي ءوزارا ءىس-قيمىلدى كۇشەيتۋدىڭ ماڭىزدىلىعىن اتاپ ءوتتى.
قازاقستان ءسىم باسشىسىنىڭ ورىنباسارى نيگەريامەن بايلانىستاردى دامىتۋدىڭ ماڭىزدىلىعىن اتاپ ءوتىپ، 2025 جىلعى قاڭتاردا ابۋ-دابيدە ەكى ەل پرەزيدەنتتەرىنىڭ كەزدەسۋى ىنتىماقتاستىقتىڭ جوعارى قارقىنىن بەلگىلەپ، سەرىكتەستىكتىڭ پەرسپەكتيۆالىق باعىتتارىن ايقىنداعانىن اتاپ ءوتتى.
"ساۋدا بايلانىستارىن نىعايتۋ ءۇشىن قازاقستان مەن نيگەريانىڭ بيزنەس سالالارى اراسىندا بايلانىس ورناتۋدى، ءوزارا ساۋدا ميسسيالارىن ۇيىمداستىرۋدى جانە ەكىجاقتى ساۋداعا قاتىستى ماسەلەلەردى بىرلەسىپ شەشۋدى ۇسىنامىز. بۇل بايلانىستاردىڭ دامۋى جاڭا ىسكەرلىك سەرىكتەستىك مۇمكىندىكتەرىن اشادى جانە ەكى ەل اراسىنداعى ەكونوميكالىق ءوزارا ءىس-قيمىلدى كۇشەيتەدى"، – دەدى قۋانتىروۆ.
ساپار اياسىندا نيگەريانىڭ گاز ءمينيسترى ەكپەريكپە ەكپومەن دە كەزدەسۋ ءوتتى. كەلىسسوزدەر بارىسىندا تابيعي گاز جەتكىزۋ، گاز وڭدەۋ تەحنولوگيالارى جانە قازاقستاندىق كومپانيالاردىڭ نيگەريانىڭ گاز ينفراقۇرىلىمىن دامىتۋعا قاتىسۋ مۇمكىندىكتەرى تالقىلاندى. نيگەريا تاراپى ەكولوگيالىق تازا تەحنولوگيالارعا كوشۋ، كومىرتەگى شىعارىندىلارىن ازايتۋ جانە تۇراقتى ەكونوميكالىق دامۋدى قامتاماسىز ەتۋگە مۇددەلى ەكەنىن اتاپ ءوتتى.
نيگەريانىڭ ونەركاسىپ، ساۋدا جانە ينۆەستيسيالار مينيسترلىگىنىڭ تۇراقتى حاتشىسى نۋرا اببا ريميمەن وتكەن كەزدەسۋدە تاۋ-كەن سالاسىنداعى ينۆەستيسيالىق مۇمكىندىكتەر، اتاپ ايتقاندا، پايدالى قازبالاردى بارلاۋ جانە وڭدەۋ سالاسىنداعى ىنتىماقتاستىق قاراستىرىلدى. قازاقستان تاراپى شيكىزاتتى وڭدەۋدىڭ يننوۆاسيالىق تەحنولوگيالارىن بىرلەسىپ قولدانۋعا جانە وندىرىستىك قۋاتتاردى بىرلەسىپ قۇرۋعا قىزىعۋشىلىق ءبىلدىردى.
قازاقستان نيگەرياعا ەكسپورتقا 300-دەن استام تاۋار اتاۋىن ۇسىندى، سونداي-اق نيگەريادان كاكاو-بۇرشاقتارىن تىكەلەي يمپورتتاۋ ماسەلەسىن قاراستىردى. ەكى ەل اراسىنداعى تاۋار تاسىمالىنا ارنالعان ىقتيمال ءۇش ساۋدا ءدالىزى قاراستىرىلىپ، ق ر كولىك مينيسترلىگىمەن بىرلەسىپ جۇمىس جۇرگىزىلۋدە.
قازاقستاندىق دەلەگاسيا نيگەريانىڭ "NEXIM Nigeria" بانكى باسشىلىعىمەن كەزدەستى. بانك ەلدەگى ەڭ ءىرى ەكسپورتتىق جانە يمپورتتىق وپەراسيالاردى قارجىلاندىرادى. كەلىسسوزدەر ناتيجەسىندە "NEXIM Nigeria" مەن قازاقستاننىڭ ەكسپورتتىق-نەسيەلىك اگەنتتىگى اراسىندا ءوزارا تۇسىنىستىك تۋرالى مەموراندۋمعا قول قويۋ تۋرالى ۋاعدالاستىققا قول جەتكىزىلدى.
بۇعان دەيىن مەملەكەت باسشىسى قاسىم-جومارت رەسەي ۇكىمەتى ءتوراعاسىنىڭ ورىنباسارى الەكساندر نوۆاكتى قابىلداعانى حابارلانعان.
