Abai oblysynyń ákimi Berik Ýáli Borodýliha aýdanyna jumys sapary barysynda «E.Zaitenov» sharýa qojalyǵynyń óndiristik keshenderin aralap, atqarylyp jatqan jumystarmen tanysty, dep habarlaidy Dalanews.kz
2001 jyly qurylǵan sharýashylyq búginde 14 myń gektarǵa jýyq jerdi igerip otyr. Onyń basym bóligi – egistik alqaby. Ótken jyly sharýashylyq 4 895 tonna dándi jáne dándi-burshaqty daqyl, 3 043 tonna kúnbaǵys jinady. Munda 1400-ge jýyq iri qara ósiriledi, onyń 400-den astamy – saýyndy siyr. Jylyna 124 tonna et jáne 1893 tonna sút óndiriledi.
Aýyl sharýashylyǵy ónimderin óńdeý tolyq jolǵa qoiylǵan. Et, sút ónimderin óndiretin tolyq tsikldi infraqurylym qalyptasqan. Sharýashylyqtyń óz naýbaihanasy bar. Iri qaranyń simmental tuqymyn asyldandyrý baǵdarlamasy da júieli túrde júrgizilip keledi.
Shujyq tsehynda kúnine jalpy salmaǵy 200 kelige deiin 13 túrli ónim daiyndalady. Sút óńdeý jelisi de qarqyndy jumys isteidi. Mundaǵy qaptamaly sút, túrli mailylyqtaǵy qaimaq, sary mai jáne «Gaýda» irimshigi Semei men aýdan halqy arasynda joǵary suranysqa ie.
Ivanovka aýylynda ornalasqan sút óńdeý tsehynda aiyna 2 500 keli irimshik pen 3 500 keli qaimaq daiyndalady. Búginde qojalyqta 140 adam turaqty jumyspen qamtylǵan.
Oblys ákimi sharýashylyqtyń shikizatty qaita óńdeý baǵytyndaǵy jumysyn joǵary baǵalady.
"Shikizatty qaita óńdeý – aýyl sharýashylyǵynyń keleshegi. Bizge shikizatty ǵana emes, daiyn ónimdi de kóbirek óndirý qajet. Oblystaǵy kóptegen sharýa qojalyqtarynda tolyq tsikl joq. Mysaly, astyq óndirse odan ónim daiyndamaidy nemese siyr saýady, odan sút ónimderi daiyndalmaidy. Al munda shikizattan bastap, dúken sóresine deiingi úderis tolyq qamtylǵan. Sondyqtan mundai keshenderdi ár aýdanda damytýymyz qajet. Ákimdik tarapynan tiisti qoldaý kórsetiletin bolady", – dedi aimaq basshysy.
