Nursultan Nazarbaev: «Qazaqstan «Shevron» kompaniiasymen erekshe qarym-qatynas ornatty»
Kezdesý barysynda taraptar Qazaqstannyń «Shevron» kompaniiasymen munai-gaz salasyndaǵy yntymaqtastyǵyn odan ári nyǵaitý máselelerin talqylady.
Elbasy munai-gaz salasyna qatysty jobalardy birlese iske asyrýdyń tiimdiligine toqtalyp, Djon Ýotsonǵa osy jumystardy atqarýǵa qosqan úlesi úshin rizashylyq bildirdi. Kompaniia basshysy Qazaqstan men «Shevron» kompaniiasynyń yntymaqtastyq máselelerin talqylap, ony ári qarai damytýǵa qatysty pikir almasýǵa múmkindik bergeni úshin Nursultan Nazarbaevqa alǵys aitty.
Nursultan Nazarbaev, Qazaqstan Respýblikasynyń Prezidenti:
– Sizben kezdeskenime qýanyshtymyn. Bizdiń áriptestigimizge, mine, shirek ǵasyrdan asty jáne de bul úshin ózińizge alǵys aitqym keledi. Bul ekijaqty tiimdi áriptestik dep sanaimyn.
Djon Ýotson, «Shevron» kompaniiasynyń direktorlar keńesiniń tóraǵasy jáne bas atqarýshy direktory:
– Prezident myrza, jumys kesteńizdiń tyǵyzdyǵyna qaramastan bizben kezdeskenińiz úshin taǵy da Sizge alǵysymdy bildiremin. Osydan 25 jyl buryn táýekelge bel býyp, bizben áriptestik ornatqanyńyzdy bilemin. Sizdiń senimińizdi aqtaýǵa biz barymyzdy saldyq.
Nursultan Nazarbaev, Qazaqstan Respýblikasynyń Prezidenti:
– Iá, muny jaqsy bilemin. Sizderge árdaiym kómektesýge ázir turatynmyn. Jasyrary joq, úlken isterge kelgen máseleler týyndap jatady. Biz kórshilerimiz arqyly eksporttaimyz. Muny jeńildetý úshin Qytaiǵa arnaiy qubyr júrgizdik. Bálkim, endigi jerde Kaspii teńizi arqyly nemese Túrkiia arqyly Eýropaǵa ótýimiz múmkin. Qazir bul máselelerdiń barlyǵy sheshilý ústinde.
Sondai-aq Djon Ýotson Qazaqstan men «Shevron» kompaniiasynyń yntymaqtastyq máselelerin talqylap, ony ári qarai damytýǵa qatysty pikir almasýǵa múmkindik týǵyzǵany úshin Nursultan Nazarbaevqa rizashylyǵyn bildirdi.
Kezdesýde Djon Ýotson Memleket basshysyna 2018 jyldyń aqpan aiynan bastap kompaniianyń bas atqarýshy direktory qyzmetin atqaratyn Maikl Virtti tanystyrdy.
Djon Ýotson, «Shevron» kompaniiasynyń direktorlar keńesiniń tóraǵasy jáne bas atqarýshy direktory:
– Kezdesýde Prezident Nursultan Nazarbaev pen Qazaqstan men «Shevron» kompaniiasy arasyndaǵy tabysty áriptestik arqasynda qol jetkizgen jetistikterimizdi eske aldyq. Ásirese «Teńiz Shevroil» kompaniiasynyń sońǵy 25 jyldaǵy qyzmeti týraly sóz boldy. Máselen, 2016 jyly munai óńdeýdiń rekordtyq kórsetkishine qol jetkizdik. Biyl da bári oidaǵydai júzege assa, byltyrǵy kórsetkishti jańartýdy kózdep otyrmyz.
Sondai-aq áriptestikti odan ári nyǵaitýdyń jańa jobasy talqylandy. Onyń qurylysyna 35 myń Qazaqstan azamaty jumyldyrylady. Jobaǵa salynatyn investitsiialardyń úshten bir bóligi shamamen 37 mlrd dollardy quraidy. Bul qarajat jergilikti qyzmet pen ónimdi satyp alýǵa jumsalady.
Maikl Virt, «Shevron» kompaniiasy direktorlar keńesi tóraǵasynyń orynbasary:
– Men úshin Prezident Nursultan Nazarbaevpen tanysý – úlken abyroi. Qazaqstan men «Shevron» kompaniiasynyń arasyndaǵy «Teńiz Shevroil» aiasynda kóptegen jyldar boiy tabysty áriptestik qalyptasty. Men keler jyldyń basynda jańa qyzmetime kiriskennen keiin, kompaniianyń burynǵy basshylary siiaqty áriptestikti odan ári nyǵaitý aiasynda qaltqysyz qyzmet etetin bolamyn.
