Qyzylorda oblysynyń ákimi Nurlybek Nálibaev biznes ókilderimen kezdesti. Jiynǵa quqyq qorǵaý jáne memlekettik organdardyń basshylary qatysty, dep habarlaidy Dalanews.kz
Aimaq basshysy biznesti qorǵaý, investorlar múddesin saqtaý, investitsiialyq jobalardy júzege asyrýdaǵy máselelerge toqtaldy.
«Ótken jyly óńirimizde 37 mlrd. teńgeniń 21 jobasy iske qosyldy. Mańyzdy ári iri jobanyń biri retinde quny 20 mlrd. 900 mln. teńgeni quraityn «Qorqyt Ata áýejaiynyń» jańa terminalyn atap ótýimiz qajet. Qazirgi tańda áýejaidyń qyzmet kórsetý salalaryn damytý, senimgerlik basqarýǵa berý úshin vetnamdyq «Soviko Grýpp» kompaniiasymen kelissóz júrgizilýde. Odan bólek, shyny zaýytynyń ishinen 5 mln. sharshy metr energiia únemdeitin shyny shyǵarý jelisi, tamaq ónerkásibinde 5 joba, logistika salasynda 1 joba qosyldy.
Bul jobalar qurylysynan bastap iske qosylǵanǵa deiin «qolmen basqarý» rejiminde súiemeldendi, týyndaǵan máseleleri der kezinde sheshildi. Respýblikalyq investitsiialar tartý keńesinde tsement zaýytynyń sanitariialyq-qorǵanysh aimaǵy, salynyp jatqan jańa jylý-elektr ortalyǵynyń qosylǵan qun salyǵy, shyny zaýytynyń taýarlyq gaz baǵasyn tómendetý máseleleri sheshimin tapty. Óńirimizge investitsiia tartý maqsatynda Koreia, Italiia, Ispaniia, Qytai elderine jasaǵan jumys saparlarymyz alǵashqy jemisin berýde. Qorqyt Ata atyndaǵy Qyzylorda ýniversitetiniń bazasynda Koreianyń SeýlTeh ýniversitetiniń elimizdegi alǵashqy Jasandy intellekt jáne informatika joǵary mektebi ashyldy.
Naýryzdyń 12-sinde Astana qalasynda Úkimet basshysy Oljas Abaiulymen birge ispaniialyq «Roca Group» kompaniiasynyń basshylyǵymen kezdesip, aldaǵy josparlardy talqyladyq. Ispandyq investormen sanitarlyq buiymdar óndirý zaýytyn salý jobasy pysyqtalýda. Qytai Halyq Respýblikacymen 10 mlrd. 800 mln. teńgeniń 9 kelisimine qol qoiyldy. Aldaǵy ýaqytta kelisimderdiń nátijesi kórine bastaidy.
Prezidentimizdiń Katar eline jasalǵan jumys sapary aiasynda óńirimizde 800 mlrd. teńgege qýattylyǵy 1 100 MVt-ty quraityn bý-gaz qondyrǵysyn salý kelisildi. Jobany ornalastyrý úshin 280 gektar jer telimi rezervke alyndy. Onyń 100 gektaryna gaz-elektr stantsiiasy salynady, qalǵan aýmaq perspektivalyq jobalardy júzege asyrý úshin belgilengen. Investitsiialyq jobalardyń máselelerin talqylap, sheshý joldaryn qarastyratyn óńirlik shtab meniń tóraǵalymmen turaqty jumys jasaýda.
Odan bólek, Óńirlik úilestirý keńesinde jer telimderi men injenerlik infraqurylym júielerin jetkizýge qatysty sheshimder qabyldandy. Quqyq qorǵaý organdarymen birlesip, aimaqtaǵy investitsiialyq jobalardy súiemeldeýdi, olardyń máselelerin sheshýdi, shaǵyn jáne orta kásipkerlik úshin biznes-ahýaldy jaqsartýdy ári qarai júieli túrde jalǵastyratyn bolamyz», – dedi N.Nálibaev.
Sońǵy 3 jylda — 2022-2024 jyldary kásipkerlikti qarjylai qoldaý úshin 16 700 jobaǵa ártúrli qarjy kózderinen 206 mlrd. teńge tartyldy. Onyń 40 mlrd. 931 mln teńgesi memlekettik baǵdarlamalar aiasynda qoldaý tapty. Biyl 29 mlrd. teńgege kásipkerliktiń 4 800 jobasy qarjylandyryldy. Bul kásipkerliktiń ekonomikadaǵy úlesin 21%-ǵa jetkizedi: 2021 j. – 18,3%, 2022 j. – 19,1%, 2023 j. – 19,9%, 2024 j 9 ai – 20,5% boldy.
Memleket basshysynyń bastamasymen qolǵa alynǵan «Aýyl amanaty» jobasy aiasynda 2023-2024 jyldary 748 joba júzege asty, 1000-nan astam jańa jumys orny ashyldy. Biyl baǵdarlama aiasynda 815 joba kózdelýde.
Agrobiznes ókilderi shaǵyn óndiris ortalyqtaryn qurýǵa basymdyq bergen. Sharýashylyq qurylymdarynyń áleýmettik jaýapkershiligi aiasynda kásibin bastaýshylardy ǵimaratpen, kepildikpen qamtamasyz etýde.
Jiyn sońynda týyndaǵan máseleler talqylanyp, kásipkerler óz oilaryn ortaǵa saldy.
