Májilis depýtaty Maqsat Tolyqbai Jambyl oblysynda biznesmenniń qarapaiym halyqqa kórsetip otyrǵan qysastyǵyn aitty. Ol Májilis minberinde sý resýrstary jáne irrigatsiia ministri Nurjan Nurjigitovten jaýap berýdi talap etti, – dep habarlaidy Dalanews.kz.
Depýtat muny bassyzdyq dep atap, mán-jaidy túsindirdi.
"Bir fazenda úshin bastaýyn Qyrǵyzstannan alatyn Shý ózenin óziniń qorasyna buryp alý degen ne sumdyq? Shý - transshekaralyq ózen. Syrdariiaǵa baryp qosylýy kerek. Alaida etektegi elge jetpei, Sozaq dalasy sorǵa ainalǵaly birneshe jyl boldy.
Turǵyndardyń aitýynsha, tas pen topyraqtan bóget salyp, ózenniń aǵysyn toqtatyp tastaǵan moiynqumdyq biznesmenge sot joq. 12 myń iri qarasy bar deidi. Dronmen túsirilgen foto-videolaryna deiin qolyma ustatty. Ózen birneshe jerden zańsyz bógelgen", - deidi Maqsat Tolyqbai.
Onyń sózinshe, maýsymda Jambyl oblysyna barǵan saparynda bul aqparattyń ras-ótirigin premer-ministrdiń ózi suraǵan, alaida jergilikti sheneýnikter men salalyq ministirlik bul "jalǵan aqparat" dep Bektenovti keri qaitarǵan.
"Sý resýrstary ministri bul fazendany nege qorǵashtap álek? Jaǵdaidy bilmei me, álde kásipkerge sózi ótpei me? Nemese 12 myń siyr asyraityn sharýashylyq ministr Nurjan Nurjigitovtyń ózine tiesili me? Tez arada mán-jaidy túsindirmeseńizder, dalasy sorǵa ainalǵan Sozaq aýdanyndaǵy 8 aýyldyń turǵyndary Astanaǵa keleiin dep otyr", - dedi depýtat.
Maqsat Tolyqbaidyń aitýynsha, ózendi jaǵalai mekendegen 80 myń halyq ekologiialyq apattyń aldynda tur.
"Sozaqtyqtardyń onsyzda ýran óndirisinen kórip jatqan ekologiialyq zardaby az emes edi. Endi mine, sýdyń joqtyǵynan jeri qyzyl qumǵa, dalasy aitaqyrǵa ainalyp, malmen kúneltken halyq shabyndyq shóptiń ózin Qyzylordadan satyp alýǵa májbúrmiz deidi. Áitpese bir kezderi Syrdariiaǵa deiin jetetin Shý ózeniniń eki jaǵy qamys, ainalasy shabyndyq bolǵan. Qazir ár jerde bir bólinip qalǵan, sasyp jatqan sý baldyrynan basqa eshteńe tappaisyń.
Alataýdan aqqan sý nege aiaǵyna deiin jetpei jatyr? Sý resýrstary ministrinen tez arada sý rettegish quraldary men zańsyz salynǵan bógetterdi buzýǵa yqtal etýin talap etemin.
Sondai-aq, gidrotehnikalyq qurylys-jailardyń is júzindegi esebi júrgizilsin. Buǵan qosa ózenniń arnasyn buryp alyp, ainalasyn topyraq, taspen qorshaǵan fazenda jaiynda baiandalǵan video-fotoǵa ministrlik tarapynan túsinikteme berilsin. Monitoring pen baqylaýdy kúsheitip, ózenge mehanikalyq tazalaý jumystaryn júrgizýdi suraimyn", - dep talap etti ol.
