Qazaqtyń áigili kompozitory, dirijer, Qazaqstannyń halyq ártisi Nurǵisa Tilendievtiń 100 jyldyǵyna arnalǵan mereitoilyq sharalar Almaty oblysynda saltanatty túrde bastaý aldy, dep habarlaidy Dalanews.kz
Biylǵy mereitoi IýNESKO deńgeiinde atalyp ótpek. Osyǵan bailanysty oblysta arnaiy jospar bekitilip, halyqaralyq jáne respýblikalyq deńgeidegi mádeni is-sharalar ótkizý kózdelgen.
1 sáýir kúni mereitoi aiasyndaǵy alǵashqy sharalar Jambyl aýylynda uiymdastyryldy. Delegatsiia Qonaev qalasynan shyǵyp, Jambyl aýdanyna jetken soń, aýdan ákimi Nurlan Ertas bastaǵan jergilikti bilik ókilderi mártebeli qonaqtardy qurmetpen qarsy aldy.
Is-shara Jambyl Jabaevtyń ádebi-memorialdyq mýzeiinde jalǵasyn taýyp, aqynnyń eskertkishine gúl shoqtary qoiylyp, rýhyna Quran baǵyshtaldy. Taǵzym rásimine Almaty oblysynyń ákimi Marat Sultanǵaziev, aýdannyń Qurmetti azamaty Serik Erkinbaiuly jáne oblystyń bas imamy Madiiar Taǵabaiuly Pirimqulov qatysty.
Budan keiin Nurǵisa Tilendievtiń eskertkishine gúl qoiý rásimi ótti. Almaty oblysynyń ákimi men óńirdiń Qurmetti azamaty Ábdimanap Abaev kompozitordyń qazaq mýzyka ónerine qosqan ólsheýsiz úlesin atap ótti.
Qonaqtar sondai-aq Jambyl Jabaevtyń ádebi-memorialdyq mýzeiin aralap, aqyn ómiri men shyǵarmashylyǵyna qatysty tyń derektermen tanysty.
Merekelik sharalar Uzynaǵash aýylynda jalǵasty. Aýdandyq Mádeniet úiinde ótken saltanatty jiynǵa oblys basshylyǵy, ziialy qaýym ókilderi, mádeniet jáne óner qairatkerleri, sondai-aq jergilikti turǵyndar qatysty.
Saltanatty jiynda Almaty oblysynyń ákimi Marat Sultanǵaziev quttyqtaý sóz sóilep, mereitoidyń qazaq mádenieti úshin mańyzdylyǵyna toqtaldy.
“Barshańyzdy qazaq óneriniń jaryq juldyzy, kúishi, dirijer, Qazaqstannyń halyq ártisi Nurǵisa Tilendievtiń 100 jyldyq mereitoiymen shyn júrekten quttyqtaimyn!
Memleket basshysy Qasym-Jomart Toqaev: «El tarihynda erekshe orny bar tulǵalarǵa qurmet kórsetý – ulttyq biregeiligimizdi nyǵaita túsedi», – dep atap ótken bolatyn. Bul mereitoi – uly kompozitordyń shyǵarmashylyǵyn ulyqtap, keiingi urpaqqa nasihattaýdyń jarqyn kórinisi.
IýNESKO deńgeiinde atalyp ótetin bul aitýly dataǵa orai, oblysymyzda arnaiy jospar qabyldanyp, halyqaralyq jáne respýblikalyq deńgeidegi mádeni is-sharalar uiymdastyrylady. Onyń ishinde «TÚRKSOI» uiymymen birlesken jobalar, aýqymdy kontsertter, sondai-aq Ile aýdanynda eńseli eskertkish ornatý, mádeniet oshaqtaryna, kósheler men bilim berý mekemelerine Nurǵisa Tilendievtiń esimin berý josparlanǵan.
Halqymyzdyń júregine án bolyp engen, rýhyn asqaqtatqan dara perzentiniń murasy máńgi jasai bermek. Uly tulǵanyń esimi men eńbegi keler urpaqqa úlgi bolyp, qazaq óneri órkendei bersin!”, – dedi óńir basshysy.
Jiynda qoǵam qairatkeri, jazýshy, Qazaqstan Jazýshylar odaǵynyń múshesi Naǵashybek Qapalbekuly da sóz alyp, Nurǵisa Tilendievtiń ulttyq mádenietke qosqan súbeli úlesi jóninde taǵylymdy oilarymen bólisti.
Saltanatty shara kontserttik baǵdarlamamen jalǵasyn taýyp, kórermenderge Nurǵisa Tilendievtiń máńgilik shyǵarmalary oryndalǵan áserli kesh usynyldy.
Aita keteiik, uly tulǵanyń 100 jyldyǵyna arnalǵan mádeni sharalar jyl boiy elimizdiń túkpir-túkpirinde jalǵasyn tappaq.
