Mańǵystaý oblysynyń ákimi Nurdáýlet Qilybai Ózbekstan Respýblikasynyń Qazaqstandaǵy Tótenshe jáne Ókiletti Elshisi Bahtiior Ibragimovty qabyldady,- dep habarlaidy Dalanews.kz
Taraptar eki el arasyndaǵy saýda-ekonomikalyq, investitsiialyq salalardaǵy yntymaqtastyqty keńeitý máselelerin talqylady.
Kezdesýde Nurdáýlet Qilybai Ózbekstan men Mańǵystaý arasyndaǵy saýda-ekonomikalyq áriptestiktiń mańyzdylyǵyna toqtalyp, bolashaqta iri jobalardy júzege asyrýǵa nietti ekenin atap ótti.
"Ózbekstan - bizge kórshiles el. Búginde Mańǵystaý oblysynda ózbek kapitalynyń qatysýymen kásiporyndar túrli salada jumys istep jatyr. Biz Ózbekstanmen iskerlik bailanysty tereńdetýge múddelimiz. Alda júzege asyrylýy tiis úlken jobalar bar. Óńirimizdiń eki teńiz porty men shekaralyq aimaqta ornalasýy – úlken múmkindikter beredi. Sondyqtan biz ózara tiimdi ári nátijeli seriktestikke daiynbyz", – dedi Nurdáýlet Qilybai.
Óz kezeginde, Elshi Bahtiior Ibragimov aldaǵy josparlarymen bólisip, ortaq jobalardy júzege asyrýǵa jáne áriptestikti odan ári nyǵaitýǵa daiyn ekenin jetkizdi.
Aita keteiik, Ózbekstan Respýblikasy – Mańǵystaý oblysynyń syrtqy saýdadaǵy negizgi seriktesteriniń biri. 2024 jyldyń qorytyndysy boiynsha ekijaqty taýar ainalymy 8,8 mln AQSh dollaryn qurady. Onyń ishinde eksport kólemi – 4,8 mln dollar, al import – 4 mln dollar.
Qazaqstannan Ózbekstanǵa negizinen gaz kondensaty, órt sóndirgishter, himiia ónerkásibiniń ónimderi, metall buiymdary jáne taldaý qurylǵylary eksporttalsa, Ózbekstannan kókónister men jemister, qurǵaq jemister, jańǵaqtar, toqyma buiymdary, aiaq kiim, qurylys materialdary, turmystyq tehnika jáne kólik quraldary importtalady.
