«Nurly Ertis» pilottyq jobasy aiasynda Nur-Sultan qalasynan Ekibastuzǵa qonys aýdarýǵa niet bildirgen 31 shańyraqtyń 17-sine páter kiltteri tabys etilgen.
Bul týraly oblystyq ákimdikte ótken apparat keńesinde óńirlik jumyspen qamtý jáne áleýmettik baǵdarlamalar basqarmasynyń basshysy Qairat Nurmaǵambetov málim etti.
- Nur-Sultan qalasynyń ákimdigimen birge baspana alý úshin kezekte turǵan kópbalaly otbasylarmen kezdesý ótkizdik, - deidi Qairat Nurmaǵambetov. - Erteń taǵy 25 otbasy keledi dep kútilýde. Oblystaǵy az qamtylǵan otbasylardy baspanamen qamtamasyz etýge 907,5 mln teńge qarajat bólinip, Aqsý qalasynda atalmysh sanattaǵy 70 otbasyn baspanamen qamtýǵa múmkindik týdy.
Ekibastuz qalasynda 13 kópbalaly otbasyna arendalyq baspana usynyldy. Demeýshilerdiń esebinen segiz otbasyna páter berildi.
Sondai-aq, eki kóp balaly otbasyna «Gidroprom» jáne «Energoýpravlenie» JShS «7-20-25» baǵdarlamasy boiynsha alǵashqy jarnany tóleý úshin 2 mln teńgege turǵyn úi sertifikattaryn tabys etti.
Bul rette oblys ákimi Bolat Baqaýov jurtshylyq arasynda durys túsindirý jumystaryn júrgizýdi jáne oblysta bos turǵan úilerdi anyqtaý úshin saraptama jasaýdy tapsyrdy.
- Pilottyq joba aiasynda respýblikalyq biýdjetten bólingen qarajat esebinen Ekibastuz qalasynda baspana beriledi, - dedi aimaq basshysy. - Sebebi, Ekibastuzda memlekettik baǵdarlama aiasynda salynǵan páterdiń bir sharshy metri 140 myń teńge bolǵan. Alaida, bir de bir páter satylmady. Budan keiin 100 myń teńgege deiin túsirgen kúnniń ózinde suraqtar boldy.
Sondyqtan úkimet deńgeiinde eńbek kúshi artyq óńirlerden jáne Nur-Sultan qalasynan jaǵdaiy qiyn otbasylarǵa kómek kórsetý maqsatynda Pavlodar oblysy boiynsha pilottyq joba qabyldandy. Bul jerde aimaqtyń demografiialyq jaǵdaiy da eskerilgenin atap ótken jón. Aqbota Seisenbaeva
Derekkóz: pavlodarnews.kz
