«Astana» meditsina ýniversitetiniń stýdentteri óz erikterimen dárigerlerge kómekke keldi. Qazir olar elorda emhanalarynda naýqastar ómiri úshin kúresýde.
«Statsionar ashylǵan sátten-aq munda jas mamandar keldi. Jumys barysynda olar bilimin, naýqaspen jumys isteý qabiletin tanytty. Dárigerler jetispei jatqan shaqta bizge kómek qolyn sozdy. Áli jas maman, intern bolǵanyna qaramastan, qabiletti jastar orasan zor kómek kórsetti» – deidi qalalyq juqpaly aýrýlar ortalyǵy mobildi ortalyǵynyń G blogy bóliminiń basshysy Baǵlan Jarmaǵambetova.
«Astana» meditsina ýniversitetiniń jetinshi kýrs stýdenti Nýriddin Rozmat 22 naýryzdan bastap dárigerlerge kómek kórsetip keledi.
«Ramada Plaza» qonaq úiinde juqpaly aýrýlar bóliminde erikti intern retinde kómek kórsete bastadym. Ol jaqta naýqastardyń birazy emdelip shyqqan soń qalalyq juqpaly aýrýlar ortalyǵyna aýystyq.
Qazirgi ýaqytta dárigerlermen birge alǵy shepte koronavirýs infektsiiasymen kúresýdemiz. Dáriger retinde basty mindetimiz – adamdarǵa kómektesý. Azamattarymyzdy indetten aman saqtaý úshin qolymyzdan kelgenin jasaimyz.
Jurtshylyqqa maska taǵyp, qoldy jii óńdeý keregin, sanitarlyq-epidemiologiialyq normalardy, áleýmettik qashyqtyqty saqtaý qajetin taǵy bir eske salǵym keledi. Sondai-aq ýaqytsha toi, týǵan kún toilaýdy doǵarǵan jón.
Ár adam óz densaýlyǵyna jaýapkershilikpen qaraýy kerek», – deidi ol. «Astana» meditsina ýniversitetiniń ekinshi kýrs stýdenti Tileýjan Hamidin de óz maqsatymen bólisti.
«Epidemiia kezinde, myńdaǵan adam koronavirýs infektsiiasymen aýyryp, indetten kóz jumyp jatqan kezde shet qala almadym. Kózde ot, keýdede nurymyz bar jastar, aǵa býyn áriptesterimizge kómek qolyn sozýǵa keldik», – dedi bolashaq dáriger.
Habarlanǵandai, shilde aiynyń basynan Nur-Sultan qalasynda meditsina ýniversiteti men kolledjiniń 536 túlegi COVID-19-ǵa qarsy kúreske tartyldy.
Túlekter emhanalarǵa, aýrýhanalarǵa, statsionarlar men jedel járdem stantsiialaryna bólindi. 25 shildedegi jaǵdai boiynsha, Nur-Sultan qalasynda COVID-19-dyń 9 494 jaǵdaiy tirkeldi, 6607 adam emdelip shyqty.
https://www.youtube.com/watch?time_continue=7&v=rUcACsDI0Us&feature=emb_title
