23 aqpanda "ádiletsiz sot sheshimderine" narazy bir top adam Nur-Sultanda jinalyp, Eýroparlamentten Qazaqstan sheneýnikterine sanktsiia salýdy surap, úndeý joldaitynyn málimdedi.
Biliktiń "Nur Otan" partiiasyn jii synaityn, jaqynda túrmeden shyqqan belsendi Sanavar Zakirovanyń aitýynsha, Eýroparlamentke úndeý jasaitynyn habarlaǵannan keiin Qazaqstannyń túrli óńirinen adamdar habarlasyp, úndeýge qosylǵysy keletinin aitqan.
"Sol sebepti aldaǵy bir-eki aptada olardyń basyn qosyp, birikken úndeý jasaimyz" dedi Zakirova. Ol biliktiń óziniń saiasi belsendiligine kedergi jasap otyrǵanyna da shaǵymdandy.
"Biz, Qazaqstan azamattary, Eýroparlament depýtattarynan memleket sheneýnikteri men "Nur Otan" partiiasyna jeke sanktsiia salý týraly ótinish jasaǵymyz keledi. Olar bizdiń konstitýtsiialyq quqyqtarymyzdy, azamattyq jáne múliktik quqyqtarymyzdy dóreki, negizsiz túrde buzdy" delingen jiynda taratylǵan baspasóz habarlamasynda.
23 aqpan kúngi jiynda Zakirovadan bólek, túrli aimaqtan kelgen birneshe adam boldy. Olar da "sot jáne quqyq qorǵaý organdarynan kórgen quqailaryn" aityp, taýysa almady. Solardyń biri Qyzylorda turǵyny Zinagúl Qutmambetova "tergeý izoliatoryna qamalǵan sap-saý ulynan aiyrylǵanyn" aityp, kóz jasyn tókti. Ol ulynyń ólimine kinálilerdiń áli kúnge deiin jazalanbaǵanyn aityp, "aqyrǵy demim taýsylǵansha ádildik ornaýy úshin kúresemin" dedi.
Halyqaralyq quqyq qorǵaý uiymdary Qazaqstandaǵy adam quqyǵy ahýalyn jii synaidy. Túrmedegi azaptaý, saiasi erkindiktiń shektelýi, belsendilerdi qýdalaý siiaqty adam quqyǵyn buzý faktileri 11 aqpanda Eýropa parlamenti basym kópshilik daýyspen qabyldaǵan "Qazaqstandaǵy adam quqyqtary jónindegi" qararda da aitylǵan edi. Bul qarardy jergilikti sarapshylar men quqyq qorǵaýshylar "keiingi jyldardaǵy eń obektivti qujat" dep atasa, bilik "teris ustanymdaǵy saiasatkerler usynǵan" degen.
11 aqpan kúngi Eýroparlament otyrysynda birqatar eýrodepýtattar Qazaqstanda adam quqyqtarynyń jaǵdaiy aitarlyqtai nasharlaǵanyn málimdep, quqyq buzýǵa qatysy bar laýazymdy tulǵalarǵa sanktsiia salýǵa úndegen.
