QR Eńbek jáne halyqty áleýmettik qorǵaý mitse-ministri Erjan Birjanov málimdegendei, 2017 jyldan bastap qazirgi ýaqytqa deiin elimizdiń eńbek kúshi artyq óńirinen eńbek kúshi tapshy aimaǵyna 9,1 myń otbasy qonys aýdaryp, 10,9 myń azamat jumysqa ornalastyrylǵan.
– Qonys aýdarýshylardy baspanamen qamtamasyz etý úshin keiin satyp alý quqyǵymen jaldamaly turǵyn úi usyný tetigi iske asyrylýda. Soltústik Qazaqstan oblysynda 2019-2020 jyldary 1 003 úi, 2020 jyly Pavlodar oblysynda 307 páter satyp alyndy, – dedi vitse-ministr.
Alaida, Keńes tóraǵasy, Májilis depýtaty Elnur Beisenbaev atalǵan turǵyn úilerdiń sapasyna qatysty azamattardan kóp shaǵym túsip jatqanyna nazar aýdartyp, jergilikti atqarýshy organdar bul máselege jaýapkershilikpen qaraý qajettigin atap ótti.
Mysaly, biylǵy qańtardan qazan aiyna deiin Túrkistan oblysynan soltústik óńirlerge 417 otbasy nemese 2 myńdai adam kóship barǵan. «Nur Otan»-nyń Túrkistan oblystyq filialy tóraǵasynyń birinshi orynbasary Beisenbai Tájibaev bul san budan da kóp bolýy múmkin edi dep esepteidi. Ol ishki kóshi-qondy yntalandyrý úshin birqatar usynysty ortaǵa saldy.
– Ishki kóshi-qondy úilestirip otyrý úshin tikelei jeli ashý qajet. Sait ashyp, málimetterdiń barlyǵy barynsha qoljetimdi bolýy úshin barlyq derekti bir bazaǵa jinaqtaǵan jón. Múmkindigine qarai soltústik óńirlerdiń ákimdikteri bizdiń oblystyń halyq tyǵyz qonystanǵan aýdandarynan front-ofis túrinde óz ókildikterin ashýy tiis. Bul tek qonys aýdarý protsesin jedeldetip qana qoimaidy, sonymen qatar bolashaq qonys aýdarýshylar úshin de edáýir jeńildik týǵyzady, – dep málimdedi Beisenbai Tájibaev.
Qonys aýdarýshylardyń basym bóligi aýyl sharýashylyǵynda jumys istegisi keletindikten, nurotandyqtar olar úshin 1-2%-pen jeńildetilgen nesie ázirleýdi usyndy.
Keńes músheleri «Nur Otan»-nyń eńbek salasyndaǵy sailaýaldy ýádeleriniń oryndalý barysyn da qarastyrdy. Biylǵy jyly 730 myńnan astam adam «Eńbek» baǵdarlamasynyń qatysýshysy bolǵan, «Bastaý biznes» jobasyn bitirýshiler sany 33 myńnan asqan. 5 myńnan astam jumyssyz azamat enbek.kz Elektrondy eńbek birjasy arqyly qysqa merzimdi kýrstardan ótken.
– Pandemiiaǵa qaramastan, elimizde jumyssyzdyq deńgeii 4,9%-ti quraidy. Eńbek daýlary men shielinisterin sheshý tártibin ońtailandyrý boiynsha zańnamaǵa túzetýler paketi ázirlendi. Memleket basshysy Qasym-Jomart Toqaev óz Joldaýynda kelesi jyldyń 1 qańtarynan bastap eń tómengi jalaqyny 42,5-ten 60 myń teńgege deiin kóterý týraly málimdedi. Bul da partiianyń sailaýaldy baǵdarlamasymen ushtasyp otyr, – dep atap kórsetti Keńes tóraǵasy.
