ق ر ەڭبەك جانە حالىقتى الەۋمەتتىك قورعاۋ ميسە-مينيسترى ەرجان ءبىرجانوۆ مالىمدەگەندەي، 2017 جىلدان باستاپ قازىرگى ۋاقىتقا دەيىن ەلىمىزدىڭ ەڭبەك كۇشى ارتىق وڭىرىنەن ەڭبەك كۇشى تاپشى ايماعىنا 9،1 مىڭ وتباسى قونىس اۋدارىپ، 10،9 مىڭ ازامات جۇمىسقا ورنالاستىرىلعان.
– قونىس اۋدارۋشىلاردى باسپانامەن قامتاماسىز ەتۋ ءۇشىن كەيىن ساتىپ الۋ قۇقىعىمەن جالدامالى تۇرعىن ءۇي ۇسىنۋ تەتىگى ىسكە اسىرىلۋدا. سولتۇستىك قازاقستان وبلىسىندا 2019-2020 جىلدارى 1 003 ءۇي، 2020 جىلى پاۆلودار وبلىسىندا 307 پاتەر ساتىپ الىندى، – دەدى ۆيسە-مينيستر.
الايدا، كەڭەس ءتوراعاسى، ءماجىلىس دەپۋتاتى ەلنۇر بەيسەنبايەۆ اتالعان تۇرعىن ۇيلەردىڭ ساپاسىنا قاتىستى ازاماتتاردان كوپ شاعىم ءتۇسىپ جاتقانىنا نازار اۋدارتىپ، جەرگىلىكتى اتقارۋشى ورگاندار بۇل ماسەلەگە جاۋاپكەرشىلىكپەن قاراۋ قاجەتتىگىن اتاپ ءوتتى.
مىسالى، بيىلعى قاڭتاردان قازان ايىنا دەيىن تۇركىستان وبلىسىنان سولتۇستىك وڭىرلەرگە 417 وتباسى نەمەسە 2 مىڭداي ادام كوشىپ بارعان. «Nur Otan»-نىڭ تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەنباي تاجىبايەۆ بۇل سان بۇدان دا كوپ بولۋى مۇمكىن ەدى دەپ ەسەپتەيدى. ول ىشكى كوشى-قوندى ىنتالاندىرۋ ءۇشىن ءبىرقاتار ۇسىنىستى ورتاعا سالدى.
– ىشكى كوشى-قوندى ۇيلەستىرىپ وتىرۋ ءۇشىن تىكەلەي جەلى اشۋ قاجەت. سايت اشىپ، مالىمەتتەردىڭ بارلىعى بارىنشا قولجەتىمدى بولۋى ءۇشىن بارلىق دەرەكتى ءبىر بازاعا جيناقتاعان ءجون. مۇمكىندىگىنە قاراي سولتۇستىك وڭىرلەردىڭ اكىمدىكتەرى ءبىزدىڭ وبلىستىڭ حالىق تىعىز قونىستانعان اۋداندارىنان فرونت-وفيس تۇرىندە ءوز وكىلدىكتەرىن اشۋى ءتيىس. بۇل تەك قونىس اۋدارۋ پروسەسىن جەدەلدەتىپ قانا قويمايدى، سونىمەن قاتار بولاشاق قونىس اۋدارۋشىلار ءۇشىن دە ەداۋىر جەڭىلدىك تۋعىزادى، – دەپ مالىمدەدى بەيسەنباي تاجىبايەۆ.
قونىس اۋدارۋشىلاردىڭ باسىم بولىگى اۋىل شارۋاشىلىعىندا جۇمىس ىستەگىسى كەلەتىندىكتەن، نۇروتاندىقتار ولار ءۇشىن 1-2%-پەن جەڭىلدەتىلگەن نەسيە ازىرلەۋدى ۇسىندى.
كەڭەس مۇشەلەرى «Nur Otan»-نىڭ ەڭبەك سالاسىنداعى سايلاۋالدى ۋادەلەرىنىڭ ورىندالۋ بارىسىن دا قاراستىردى. بيىلعى جىلى 730 مىڭنان استام ادام «ەڭبەك» باعدارلاماسىنىڭ قاتىسۋشىسى بولعان، «باستاۋ بيزنەس» جوباسىن بىتىرۋشىلەر سانى 33 مىڭنان اسقان. 5 مىڭنان استام جۇمىسسىز ازامات enbek.kz ەلەكتروندى ەڭبەك بيرجاسى ارقىلى قىسقا مەرزىمدى كۋرستاردان وتكەن.
– پاندەمياعا قاراماستان، ەلىمىزدە جۇمىسسىزدىق دەڭگەيى 4،9%ء-تى قۇرايدى. ەڭبەك داۋلارى مەن شيەلىنىستەرىن شەشۋ ءتارتىبىن وڭتايلاندىرۋ بويىنشا زاڭناماعا تۇزەتۋلەر پاكەتى ازىرلەندى. مەملەكەت باسشىسى قاسىم-جومارت توقايەۆ ءوز جولداۋىندا كەلەسى جىلدىڭ 1 قاڭتارىنان باستاپ ەڭ تومەنگى جالاقىنى 42،5-تەن 60 مىڭ تەڭگەگە دەيىن كوتەرۋ تۋرالى مالىمدەدى. بۇل دا پارتيانىڭ سايلاۋالدى باعدارلاماسىمەن ۇشتاسىپ وتىر، – دەپ اتاپ كورسەتتى كەڭەس ءتوراعاسى.
