Keńes hatshysy Dáýren Bijumanov málimdegendei, «bir tereze» qaǵidaty boiynsha memlekettik qyzmet kórsetý 96%-ke, elektrondyq formatta 94%-ke deiin artqan, 23 proaktivti memlekettik qyzmet engizilgen, olar azamattardyń ótinishinsiz kórsetiledi. Onlain baqylaý-kassa mashinalaryn qoldaný el kóleminde 98%-ke deiin artqan. Keńes memlekettik organdar úshin barlyǵy 180-nen astam usynys ázirlegen.
Budan bólek, Keńes músheleri sybailas jemqorlyqqa qarsy is-qimyl boiynsha partiialyq baǵdarlamalardy oryndaý jóninde júrgizilgen zańnamalyq jumysqa nazar aýdardy. Máselen, Jer kodeksine jer ýchaskesiniń nysanalyq maqsatyn ózgertý rásimderin ońtailandyrý bóliginde ózgerister engizilgen, Jeke turǵyn úi qurylysy úshin jer ýchaskesin alýǵa arnalǵan kezekte tuúrýshylardyń biryńǵai elektrondy tizilimi engizildi. Qosymsha Ákimshilik rásimdik-protsestik kodeks kúshine endi, «Jergilikti ózin-ózi basqarý týraly» jáne «Qoǵamdyq baqylaý týraly» zań jobalary ázirlendi.
Áitse de, Dáýren Bijumanov sybailas jemqorlyqqa qarsy is-qimyldy odan ári jetildirý qajettigine nazar aýdardy.
«Sybailas jemqorlyqqa qarsy saiasatta óńirlerdiń rólin kúsheitý maqsatynda strategiialyq kórsetkishter kartasyna, ulttyq josparlarǵa jáne oblystardyń, respýblikalyq mańyzy bar qalalardyń, astananyń damý josparlaryna «Sybailas jemqorlyq deńgeii» indikatoryn engizý qajet dep sanaimyz», – dep atap kórsetti Keńes hatshysy.
Keńes tóraǵasy, Májilis depýtaty Erlan Sairov óz kezeginde partiialyqtar aralasqannan keiin ǵana azamattardyń máseleleri sheshimin tapqan birqatar naqty keisti keltirdi. Mysaly, Soltústik Qazaqstan oblysynda paidalanylmai turǵan 59 myń ga aýyl sharýashylyq jeri memleket menshigine qaitarylyp, basqa áleýetti jer paidalanýshyǵa berilgen. Shymkentte birneshe turǵyn úi alaby sý kózine qosylǵan. Qala boiynsha sapaly aýyz sýmen qamtamasyz etý kórsetkishi 96% boldy.
Biyl Keńes músheleri óńirlik ákimdikter janyndaǵy sybailas jemqorlyqqa qarsy is-qimyl jónindegi vedomostvoaralyq komissiialarǵa tekserý júrgizip, sybailas jemqorlyq qaterlerin taldady.
«Sybailas jemqorlyqtyń aldyn alý jumysyna salǵyrt qaraǵany, partiianyń Sybailas jemqorlyqqa qarsy is-qimyldyń 2015-2025 jyldarǵa arnalǵan baǵdarlamasyn iske asyrý boiynsha Jol kartasyn oryndaýda jetkilikti jumys júrgizgeni, sondai-aq senip tapsyrylǵan bólimshelerde, Keńes qaýlylaryn oryndaýda atqarýshylyq tártiptiń bosańdyǵy úshin partiia múshesi bolyp tabylatyn 19 laýazymdyq tulǵaǵa qatysty partiialyq jaza sharasy qoldanyldy», – dep málimdedi Erlan Sairov.
